Кисида Байденга Super Mario ўйинчоқларини совға қилди
Олам
−
10 Апрель 4234
АҚШда расмий ташриф билан бўлиб турган Япония Бош вазири Фумио Кисида АҚШ Президенти Жо Байденга 2024 йил бошида зилзиладан жабр кўрган Япониянинг Ното минтақасидан қўлда ясалган эсдалик совғалари ҳамда Nintendo компаниясининг Super Mario Bros. қаҳрамонлари тасвирланган турли товарларни совға қилди. Бу ҳақда Япония Ташқи ишлар вазирлиги хабар берди.
Қайд этилишича, Кисида номидан Америка Президентига япон технологиясидан фойдаланган ҳолда тайёрланган Wajima-Nuri кофе стаканлари ва ёзув асбоблари тўплами совға қилинган. Япония Бош вазири Байденга Super Mario Bros. оламидаги қаҳрамонлар, жумладан, ака-ука Мариоларнинг, шунингдек, малика Пич ва Ёши динозаврлари ўйинчоқларни совға қилди. Тўпламга, шунингдек, идишлар, сумка ва франчайзинг қаҳрамонлари тасвири туширилган футболка киради.
Ўз навбатида, Япония ҳукумати раҳбарининг рафиқаси Юко Кисида Жилл Байденга япон заргарлари ясаган тақинчоқлар тўплами – билагузук, занжир ва сирғаларни совға қилди.
Япония Бош вазири АҚШда давлат ташрифи билан бўлиб турибди. Унга Ташқи ишлар вазири Ёко Камикава ҳамда Иқтисодиёт, савдо ва саноат вазири Кэн Саито ҳамроҳлик қилмоқда. Кисида бугун, 10 апрель куни АҚШ Президенти Жо Байден билан музокаралар ўтказиши, эртага эса АҚШ Конгрессида нутқ сўзлаши кутилмоқда. Бундан ташқари, Филиппин Президенти кичик Фердинанд Маркос иштирокида уч томонлама саммит ўтказилиши режалаштирилган.
Live
Барчаси
