Россияга яқин давлатлар ҳам урушга шубҳа билан қарашади – Шольц 

Москва билан яқин алоқада бўлган давлатлар ҳам Украинада уруш ўтказиш мақсадга мувофиқлигига шубҳа билан қарайди. Бу ҳақда Германия федерал канцлери Олаф Шольц кеча, 19 апрель куни Хемницда бўлиб ўтган тадбирда сўз очди.

"Дунёда бу урушнинг Россия учун маъноси борлигига ишонадиган ҳукумат раҳбари деярли йўқ. Бу Россияга жуда яқин бўлганларга ҳам тегишли", дейди у.

Шольцнинг бу сўзлари Германия канцлери 14-17 апрель кунлари расмий ташриф билан бўлган Хитойдан қайтганидан кейин айтилди. Германия ҳукумати раҳбари Хитой Украинадаги урушни тугатиш бўйича дипломатик жараёнда иштирок этишга тайёрлигини очиқ эълон қилганини таъкидлади. Бундан ташқари, Шольцнинг сўзларига кўра, Пекин июнь ойи ўрталарида Швейцарияда режалаштирилган Украина бўйича тинчлик саммитини ижобий баҳолаган.

"Бу эътиборсиз қолдириб бўлмайдиган натижа. Ва бу уч ёки олти ой олдин кутилганидан ҳам кўпроқ", деган канцлер.

Шунингдек, Олаф Шольц Украинадаги уруш яна бир неча йил давом этиши мумкинлигини ва Владимир Путин “бундан қутулиб қолмаслигини” айтди. Германия канцлери Берлин Киевга ҳарбий ёрдам беришда давом этишини тасдиқлади, бироқ айни пайтда дипломатик саъй-ҳаракатларнинг муҳимлигига эътибор қаратди.

Шу билан бирга, Шольц яна Украинадаги урушни Путин билан телефон орқали муҳокама қилиши мумкинлигини истисно этмади. 

"Аммо, албатта, биз нима ҳақида гаплашишимиз аниқ бўлиши керак", дейди у. 

Германия канцлери яна бир бор Россия Президентини империалистик мақсадларга интилаётганликда ва Украинанинг мавжудлигини шубҳа остига қўймоқчиликда айблади.

Эслатиб ўтамиз, Хитойга ташрифи чоғида Шольц Хитой раҳбари Си Цзиньпинни Украинадаги урушни тугатиш учун Россия Президенти Владимир Путинга таъсир ўтказишга чақирганди.