10 карра жаҳон чемпиони фирибгарлик учун жазоланди

Аввалроқ, Биатлон бўйича 10 карра жаҳон чемпиони – франциялик спортчи Жюлья Симон фирибгарлик ва ўғриликда гумонланаётгани ҳақида хабар берилган эди. Кеча, 24 октябрь куни Альбервиль жиноят суди Симонни айбдор деб топди ва спортчига уч ойлик шартли қамоқ жазоси ҳамда 15 минг евро жарима тайинлади. Бу ҳақда “L’Equipe” нашри  хабар берди.

Суд мажлисида Симон “барча айбловларни” тан олди. У 2022 йилда жамоадоши Жюстин Брезаз-Буше ва француз ҳамширасининг банк карталаридан онлайн харидлар учун фойдаланган. Зарарнинг умумий миқдори 2300 еврони ташкил этган.

Спортчи судда жабрланувчилардан узр сўраб, ўз ҳаракатларини “тушунтириб бера олмаслигини” айтди. 

“Мен буни яширишим керак эди, лекин нима учун бундай қилганимни билмайман”,  дейди Симон. 

У ҳозирда “бўлиб ўтган воқеаларни тушуниш, ўсиш ва ривожланиш учун” психолог билан ишлаётганини билдирди.

Ҳукм эълон қилингач, Франция чанғи федерацияси расмий баёнот эълон қилди. Унда федерация суд қарорини “эътиборга олганини” маълум қилди ва Миллий интизом комиссияси билан яқин кунларда спортчига нисбатан интизомий чора кўриш учун йиғилишини билдирди.

Федерация, шунингдек, спортчилар ва жамоа муҳитини ҳимоя қилиш учун барча зарур чоралар кўрилаётганини таъкидлади.

Маълумот учун, Жюлья Симон 2022 йилги Пекин Олимпиадаси кумуш медали соҳиби, 10 карра жаҳон чемпиони ва 2023 йилда Биатлон бўйича Жаҳон кубоги ғолиби ҳисобланади.

Эслатиб ўтамиз, аввалроқ италиялик икки сузувчи Бенедетта Пилато ва Чиара Тарантино Сингапурда косметик маҳсулотлар ўғирлагани учун 90 кунга дисквалификация қилингани ҳақида хабар берилган эди.