48 ёшли эркак хотинини сохта ЙТҲ орқали ўлдирди

Италиянинг Пулия ҳудудида 48 ёшли фермер ўз рафиқасини аввал бошига қаттиқ жисм билан уриб, сўнг тириклайин автомашина ичида ёқиб юборгани гумон қилинмоқда. Ҳодиса 2024 йил 27 сентябрь куни Сан-Северо шаҳри яқинида содир бўлган. Шубҳали шахс полицияга қўнғироқ қилиб, буни йўл-транспорт ҳодисаси деб кўрсатишга уринган. Бу ҳақда ANSA ёзди.

Тергов маълумотига кўра, 47 ёшли аёл аввал ҳушидан кетказилган, кейин эса оилавий Fiat 500 автомобилига ўт қўйилган. Қотилликда ишлатилган қурол топилмаган.

Суд-тиббий экспертиза аёл ёнғин пайтида тирик бўлганини кўрсатган – унинг ўпкасида углерод оксиди излари аниқланган. Бу эса ёнғин вақтида нафас олганини тасдиқлайди. Гумонланувчи олдиндан режалаштирилган қотиллик айби билан ҳибсга олинган ва тергов давом этмоқда.

Эслатиб ўтамиз, 2026 йил 6 февраль куни Андижон вилояти Булоқбоши туманида 17 ёшли ўсмир ўз таниши билан аввалроқ ўртасида юзага келган низо оқибатида жанжаллашиб, хўжалик пичоғи билан унга тан жароҳати етказган ҳолда қасддан ўлдирган эди.