Абдулазиз Комилов Ўзбекистон нега “Тинчлик кенгаши”га қўшилганини айтди (видео)

Кеча, 22 январь куни Ўзбекистон Президенти Шавкат Мирзиёев Давосда АҚШ Президенти Дональд Трамп ташаббуси билан ташкил этилган Ғазо бўйича “Тинчлик кенгаши” низомини имзолади ва кенгашнинг таъсисчи давлатларидан бирига айланди. Ўзбекистон Президентининг маслаҳатчиси, собиқ ташқи ишлар вазири Абдулазиз Комилов мамлакатнинг нега “Тинчлик кенгаши”га қўшилганини айтди. Бу ҳақда у “Ўзбекистон 24” телеканалига берган интервьюсида гапирди.

“Тинчлик кенгаши”нинг олдида турган вазифа, авваламбор, Ғазо инқирозини ҳал қилиш. Бизнинг Президентимиз Дональд Трампнинг таклифини қабул қилиб, розилик бердилар. Савол туғилади: биз нима учун бу ташаббусини қўллаб-қуватладик? Биринчидан, хавфсизлик нуқтаи назаридан, албатта, бизнинг манфаатларимиз бор. Иккинчидан, мана шу кенгашнинг олдида турган вазифалар, мақсадлар бизнинг ташқи сиёсатимизда асосий тамойилларига тўлиқ жавоб беради ва мос келади. Учинчидан, ҳақиқатан ҳам бу минтақада бизнинг жуда жиддий ҳаётий манфаатларимиз бор”, дейди у.

Комиловнинг айтишича, Ўзбекистон Яқин Шарқ минтақасининг бошқа давлатларидаги нотинчлик барҳам топишидан манфаатдор. Чунки бир неча йил олдин Ўзбекистондан фуқаролар ушбу минтақадаги давлатларга бориб турли экстремистик оқимларга қўшилган ва Ўзбекистоннинг ўзига муаммо туғдиришга ҳаракат қилган.

“Бир неча йил олдин бизнинг муҳтарам Президентимиз оқилона сиёсатни амалга ошириб, Яқин Шарқдаги жараёнларга жуда катта махсус эътибор бердилар. Биз учун энг хавфли жараён шундан иборат бўлдики, Марказий Осиёдан, ҳаттоки, Ўзбекистондан бир неча гуруҳлар, фуқароларимиз мана шу Яқин Шарққа кетиб, ҳар хил экстремистик оқимларга, ташкилотларга, гуруҳларга қўшилиб, кейин Ўзбекистонга қайтиб келиб, биз учун муаммо туғдиришга ҳаракат қилмоқчи ҳам бўлган. Лекин биз уларни қайтариб олиб келдик. Қайтариб олиб келгандан кейин ижтимоий янги ҳаётга киритиши учун шароитлар яратиб берилди”, дейди Президент маслаҳатчиси.

Унинг билдиришича, мана шундай меҳрбонлик Бирлашган Миллатлар Ташкилоти раҳбарияти томонидан жуда юқори баҳоланган ва уларнинг гапига қараганда, Ўзбекистон Президентининг сиёсати бутун дунёда намуна бўлиши мумкин.

“Биз шунинг учун айтишимиз мумкин, Ўзбекистоннинг шу минтақадаги бошқа давлатларда манфаатлари бор ва у манфаатдорлик яна шундан иборатки, авваломбор, ўзимизнинг хавфсизлигимизни таъминлаш”, дейди Абдулазиз Комилов. 

Унинг айтишича, Ўзбекистоннинг “Тинчлик кенгаши”га қўшилишининг яна бир сабабларидан бири Афғонистондаги вазият ҳам айнан Яқин Шарқдаги урушлар сабаб кескинлашган. Чунки мамлакатга асосан шу минтақадан экстремист, террорист ташкилотлар кириб келган.

“Афғонистон – қўшнимизга ҳужум бошланишидан олдин у ерда ҳеч қандай экстремист, террорист ташкилотлар бўлмаган. Лекин уруш бошлангандан кейин кўпинча мана шунақа ташкилотлар, гуруҳлар қаердан келди? Яқин Шарқдан келди. Албатта, Яқин Шарқ муаммосини ҳал қилиш – бу осон масала эмас. XX асрда Яқин Шарқнинг боши урушдан чиқмаган. Шунинг учун албатта, бу масалани ҳал қилиш учун бутун халқаро ҳамжамият бирлашиб, нафақат Америка Қўшма Штатлари, араб давлатлари, мусулмон давлатлари, мана шу Марказий Осиё давлатлари биргаликда ҳаракат қилиши керак. Ҳар битта қадам ўйлаб босилиб, тинчлик ўрнатилса, барқарорлик ўрнатилса, муҳим қадам бўлади. Биз халқаро ҳамжамият билан ўзимизнинг ҳамкорлигимизни давом эттирамиз”, дейди Абдулазиз Комилов.

Эслатиб ўтамиз, аввалроқ Шавкат Мирзиёев Швейцариянинг Давос шаҳрида “Тинчлик кенгаши” низомини имзолаш маросимида иштирок этгани ҳақида хабар берилган эди. Бу орқали Ўзбекистон уни таъсис этган давлатлардан бирига айланди. АҚШ Президенти Дональд Трамп раислигида ўтган тадбирда Аргентина, Арманистон, Баҳрайн, Болгария, Индонезия, Иордания, Марокаш, Мўғулистон, Озарбайжон, Парагвай, Покистон, Қатар, Қозоғистон, Саудия Арабистони, Туркия, Венгрия ва бошқа давлатлар раҳбарлари, Бош вазирлари ва Ташқи ишлар вазирлари ҳам қатнашган.

Шунингдек, “Тинчлик кенгаши” низомини имзолаш маросими доирасида Ўзбекистон Республикаси Президенти Шавкат Мирзиёев, Озарбайжон Республикаси Президенти Илҳом Алиев ва Венгрия Бош вазири Виктор Орбан ўртасида мулоқот бўлиб ўтди.

Шу билан бирга, Шавкат Мирзиёев Давосдаги тадбирлар доирасида Европа тикланиш ва тараққиёт банки президенти Одиль Рено-Бассо билан учрашув ўтказди.