АҚШ Венесуэла билан урушмоқчи эмас – Трамп

Америка Қўшма Штатлари Венесуэла билан қуролли тўқнашувга боришни истамайди ва айни дамда мамлакатлар жанговар ҳолатда ҳам эмас. Бу ҳақда АҚШ Президенти Дональд Трамп “NBC News” телеканалига берган интервьюсида сўз очди.

Трампга кўра, Венесуэла расмийлари гиёҳванд моддалар савдоси билан шуғулланувчилар ва қамоқхоналаридаги маҳбусларини, шунингдек, руҳий касалликлар шифохоналарининг беморларини АҚШга юбормоқда. Вашингтон эса бундай ҳаракатларни амалга ошираётган расмийларга қарши кураш олиб бормоқда. Шу билан бирга, у зарурат туғилса, АҚШ кучлари яна Венесуэлага юборилиши мумкинлигини ҳам истисно этмаган.

“Америка Венесуэла билан уруш қилмоқчи эмас. Биз ёмон одамларга қарши курашдик, холос”, деган Оқ уй раҳбари.

Трампнинг айтишича, Венесуэлани бошқаришда АҚШ томонидан иштирок этадиган амалдорлар гуруҳига Давлат котиби Марко Рубио, Мудофаа вазири Пит Ҳегсет, Оқ уй маъмурияти раҳбари ўринбосари Стивен Миллер ва вице-президент Жей Ди Вэнс киради. Бошқарувдаги асосий шахс эса Трампнинг ўзи бўлиб қолади.

Оқ уй етакчисининг фикрича, Венесуэлада яқин 30 кун ичида сайлов ўтказишнинг имкони йўқ, чунки аввало мамлакатда тартиб ўрнатиш керак.

“Бунга вақт кетади. Биз мамлакатнинг тикланишига ёрдам беришимиз керак”, деган Трамп.

У, шунингдек, вақтинча президент сифатида қасамёд қилган Делси Родригес АҚШ билан ҳамкорлик қилаётганини айтган. Унинг таъкидлашича, Николас Мадуро ва унинг рафиқасини қўлга олиш бўйича операциягача АҚШ Венесуэла расмийларининг бирортаси  билан ҳеч қандай алоқада бўлмаган. Трамп Родригес ҳам АҚШ санкциялари остида эканини эслатиб, уларнинг сақланиб қолиши ёки бекор қилиниши масаласи яқин вақтда ҳал этилишини билдирган. Шу билан бирга, агар Родригес АҚШ билан ҳамкорликни тўхтатса, Қўшма Штатлар яна куч ишлатиши мумкинлигини ҳам тан олган.

Венесуэланинг муваққат президенти эса аввалроқ Трампга мурожаат қилиб, венесуэлаликлар “уруш эмас, тинчликка лойиқ” эканини айтганди.

Эслатиб ўтамиз, 3 январь куни тунда Венесуэла пойтахти Каракас шаҳрида портлашлар содир бўлганди. Шундан сўнг АҚШ Президенти Дональд Трамп Қўшма Штатлар Венесуэлага кенг кўламли зарбалар берганини, Венесуэла Президенти Николас Мадуро эса рафиқаси билан бирга қўлга олиниб, мамлакатдан олиб чиқиб кетилганини билдирди.

Дастлабки маълумотларга кўра, АҚШнинг Венесуэлада ўтказган операцияси оқибатида камида 40 киши ҳалок бўлган.

Кеча, 5 январь куни Николас Мадуро ва унинг рафиқаси Нью-Йорк судида иштирок этиб, ўзларига қўйилган айбловларни тан олмасликларини маълум қилди. Нью-Йоркдаги суд мажлисида Мадуро ўзини ҳалол инсон эканини айтиб, ҳануз Венесуэла Президенти бўлиб қолаётганини таъкидлаган. АҚШ суди Мадурога Венесуэла консуллик ходимлари билан учрашишга рухсат берган. Кейинги суд мажлиси жорий йилнинг 17 март куни бўлиб ўтади.