АҚШда гепатит D’га қарши дори яратилди

АҚШ Озиқ-овқат ва дори воситаларини назорат қилиш бошқармаси (FDA) сурункали D гепатитини даволаш учун дори воситасини илк марта тасдиқлади. Бу ҳақда “Gilead Sciences” компанияси хабар қилди.

Компания ишлаб чиққан Hepcludex (булевиртид) препарати ҳақида кетмоқда. Гепатит D (HDV) вирусли гепатитнинг энг оғир шакли ҳисобланади. Чунки у тезда жигар циррози, жигар саратони, жигар етишмовчилиги ва ўлимга олиб келиши мумкин. Шу билан бирга, D гепатити мустақил мавжуд бўлмайди – у фақат B гепатити билан зарарланган одамларда ривожланади.

Компаниянинг маълумотига кўра, АҚШнинг ўзида тахминан 40-80 минг киши ушбу касаллик билан яшайди. Дунё бўйича эса беморлар сони 12 миллион атрофида. Шу вақтгача АҚШда гепатит D учун тасдиқланган даволаш усули умуман бўлмаган.

Hepcludex (булевиртид) ҳар куни инъекция кўринишида қўлланади. Препарат вируснинг жигар ҳужайраларига киришини блоклайди ва инфекция тарқалишини секинлаштиради. АҚШ Озиқ-овқат ва дори воситаларини назорат қилиш бошқармаси препаратни оғир касалликлар учун қўлланадиган тезлаштирилган тартибда тасдиқлаган.

Тадқиқотда 150 нафар бемор иштирок этган. Улар уч гуруҳга ажратилган: бир қисмига 2 миллиграмм, бошқа қисмига 10 миллиграмм булевиртид берилган, назорат гуруҳи эса вақтинча вирусга қарши даво олмаган. Даволаш 48 ҳафта давом этган. Натижада препарат қабул қилган беморларнинг тахминан 48 фоизида вирус юкламаси сезиларли даражада камайган ва жигар ферментларининг кўрсаткичлари меъёрга келган. Назорат гуруҳида эса, бундай натижа атиги 2 фоиз беморда кузатилган. Кузатувларга кўра, 144 ҳафталик терапиядан кейин беморларнинг ярмида вирус аниқланмайдиган даражага тушган.

Шу билан бирга, АҚШ Озиқ-овқат ва дори воситаларини назорат қилиш бошқармаси муҳим огоҳлантириш ҳам берган: даволашни кескин тўхтатиш B ва D гепатитларининг бир вақтнинг ўзида кучайишига сабаб бўлиши мумкин, айниқса жигари оғир зарарланган беморларда.

Эслатиб ўтамиз, аввалроқ сунъий интеллект неврологик касалликларни даволаш учун янги дориларни тезроқ излашда муҳим воситага айланиши мумкинлиги ҳақида хабар берилган эди.