Аморим қайси клубни бошқариши мумкинлиги маълум бўлди

“Манчестер Юнайтед”нинг собиқ бош мураббийи Рубен Аморим Португалия лигасига қайтиши мумкин. Мутахассис “Бенфика” бош мураббийи лавозимига номзод сифатида кўриб чиқилмоқда. Бу ҳақда “talkSPORT” нашри хабар берди.

Манбага кўра, Лиссабон клубининг ҳозирги мураббийи Жозе Моуриньонинг келажаги номаълум. Унинг шартномасида 2026 йил ёзида муддатидан олдин кетиш имконияти мавжуд. Агар Моуриньо Роберто Мартинеснинг кетиши сабабли Португалия терма жамоасини бошқариш таклифини олса, бу вариант фаоллашиши мумкин.

Аморим Моуриньонинг ўрнини босишга асосий даъвогарлардан бири ҳисобланади. У “Бенфика” ёшлар тизимида ўқиган ва икки мавсум жамоада ўйнаган. Мураббийлик фаолиятида эса Аморим Португалияда “Каса Пиа”, “Брага” ва “Спортинг” жамоаларида ишлаган.

Маълумот учун, “Бенфика” айни пайтда Португалия чемпионатида учинчи, Чемпионлар лигаси жадвалида эса 25-ўринни эгаллаб турибди.

Эслатиб ўтамиз, аввалроқ Рубен Аморим “Манчестер Юнайтед” жамоаси бош мураббийи лавозимидан озод этилган эди.