“Барселона” футболчиси мундиални ўтказиб юборади

“Барселона” ярим ҳимоячиси Фермин Лопес 2026 йилги Жаҳон чемпионати ўтказиб юборади. Бу ҳақда клуб матбуот хизмати хабар берди.

Маълум бўлишича, Испания терма жамоаси аъзоси Лопес Ла Лиганинг 37-туридан ўрин олган “Реал Бетис”га қарши баҳсда (3:1) жароҳат олган ва биринчи бўлимдан кейин алмаштирилган.

Клуб баёнотига кўра, Лопес кучли зарбадан кейин ўнг оёғидаги бешинчи метатарзал суягини синдириб олган ва футболчи операция қилинади.

Луис де ла Фуэнте яқин бир ҳафта ичида мундиал учун Испания терма жамоасининг таркибини эълон қилиши кутилмоқда. Хабарларга кўра, рўйхатдан тўққиз нафаргача “Барселона” футболчиси ўрин олиши мумкин.

Маълумот учун, Испания терма жамоаси 2026 йилги Жаҳон чемпионатидаги илк учрашувини жорий йилнинг 15 июнь куни Кабо-Вердега қарши ўтказади. Шунингдек, жамоа гуруҳ босқичида Саудия Арабистони ва Уругвай терма жамоалари билан ҳам баҳс олиб боради.

Эслатиб ўтамиз, аввалроқ Нидерландия терма жамоаси ва “Манчестер Юнайтед” ҳимоячиси Маттейс де Лигт белидан операция қилингани ва 2026 йилги Жаҳон чемпионатини ўтказиб юбориши ҳақида хабар берилганди.