Бокс афсонаси Кроуфорд фаолиятини якунлади

Бокс бўйича собиқ жаҳон чемпиони, америкалик Теренс Кроуфорд профессионал боксдаги фаолиятини якунлаганини эълон қилди. Бу ҳақда боксчи ўзининг Instagram саҳифаси орқали маълум қилди.

“Мен буюк инсон сифатида кетяпман. Исботлаш учун энди ҳеч нарсам қолмади”, деб ёзди Кроуфорд.

Шунингдек, у YouTube-каналида жойлаштирилган видеода боксдаги йўли, эришган ютуқлари ва мағлубиятсиз фаолиятини якунлаётгани ҳақида гапирди.

“Мен бу спортга бор кучимни бердим. Энг кучлилар билан жанг қилдим, вазн тоифаларида юқорига кўтарилдим ва ўз шартларим билан тарихга кирдим. Уч карра мутлақ чемпион. Бешта вазн тоифасида жаҳон чемпиони. Қисқартирилган йўллар йўқ. Баҳоналар йўқ.

Бу бокс билан хайрлашув эмас – бу миннатдорчилик. Оиламга, жамоамга, шаҳримга ва бу йўлда мен билан бирга бўлган барча мухлисларга раҳмат. Бугунги инсон бўлишимга сабаб бўлган спортга ташаккур. Қўлқоплар ечилди, аммо мерос абадий. Тарих ҳеч қачон ортда қолмайди”,  дейди Кроуфорд.

Кроуфорд жорий йилнинг сентябрь ойида мексикалик Сауль “Канело” Альварес устидан қозонилган ғалаба орқали супер ўрта вазн тоифасида жаҳон чемпиони бўлган эди. Шу тариқа, америкалик боксчи тарихда учта вазн тоифасида мутлақ чемпионликни қўлга киритган илк боксчига айланган.

Эслатиб ўтамиз, декабрь ойининг бошида WBC ташкилоти Теренс Кроуфорд бокс бўйича мутлақ жаҳон чемпиони унвонидан маҳрум этилганди. Ташкилот уни чемпионлик бадалини тўламагани сабаб камаридан маҳрум қилган эди.