Бразилиядаги стадион томи мусобақа пайтида ёниб кетди (видео)

Кеча, 8 апрель куни Бразилиянинг Рио-де-Жанейро шаҳридаги стадион томи қиличбозлик бўйича турнир вақтида ёниб кетди. Халқаро қиличбозлик федерацияси (FIE) ҳолат юзасидан баёнот берди.

Қайд этилишича, жорий йил 1 апрелдан бошлаб Олимпия велодромида қиличбозлик бўйича ўсмирлар ва кадетлар ўртасидаги Жаҳон чемпионатининг саралаш баҳслари ўтказилаётган бўлган. Бироқ кеча, 8 апрель куни ёнғин чиқиб, бинонинг томи ёниб кетган.

“Ҳодиса содир бўлган вақтда объект бўш бўлган ва маҳаллий ҳокимият органлари жабрланганлар йўқлигини тасдиқлашди. Ўсмирлар ва кадетлар ўртасидаги Жаҳон чемпионатининг барча иштирокчилари хавфсизлиги ва фаровонлиги бизнинг мутлақ устувор вазифамиздир”, дейилади FIE баёнотида.

Турнир Рио-де-Жанейрода 1 апрелдан 9 апрелгача “Арена Кариока” ва Олимпия велодромида бўлиб ўтмоқда. Ёнғиндан сўнг турнирнинг қолган қисми фақат “Арена Кариока”да ўтказиладиган бўлди.

“Барча жалб қилинган жамоаларнинг тезкор ҳаракати иш жараёнини зудлик билан қайта ташкил этиш ва мусобақани хавфсиз ҳамда белгиланган муддатда давом эттириш имконини берди”, дея маълум қилди федерация.