Бу икки футболчи биринчи марта тортишаётгани йўқ – Перес 

“Реал Мадрид” президенти Флорентино Перес клуб футболчилари ўртасида юз берган можаро ҳақида фикр билдириб, бу воқеа олдин ҳам кўп содир бўлганини таъкидлади. Бу ҳақда у кеча, 12 май куни журналистлар билан ўтказилган матбуот анжуманида сўз очди.

“Жанжалнинг ўзи даҳшатли эди, аммо ундан ҳам ёмони – бу воқеа оммага сиздирилди. Бу икки футболчи биринчи марта тортишаётгани йўқ. Улар ҳар мавсумда рақобат туфайли шундай ҳолатларга дуч келишади. Фақат бу сафар воқеа ошкор бўлди ва биз буни ким тарқатганини биламиз”, дейди Перес.

Аввалроқ, Федерико Вальверде ва Орельен Тчуамени машғулотдан кейин кийиниш хонасида жанжаллашиб қолган эди. 

Маълумотларга кўра, можаро вақтида Вальверде йиқилиб, бошидан жароҳат олган ва кейинчалик шифохонага ётқизилган. Унга чок қўйилгани ҳамда клуб ички интизомий текширув бошлагани айтилган. Вальверденинг ўзи эса ҳодиса вақтида тасодифан столга урилиб кетганини, Тчуамени эса унга зарба бермаганини таъкидлаган. 

Шунга қарамай, клуб Вальвердега бош мия чайқалиши ташхиси қўйилганини ва у 10–14 кун майдонга туша олмаслигини маълум қилган.

Кейинчалик “Реал Мадрид” раҳбарияти ҳар икки футболчини 500 минг евродан жаримага тортгани хабар қилинди. Клуб баёнотида футболчилар содир бўлган воқеадан пушаймон экани ва бир-биридан узр сўрагани қайд этилган.

Эслатиб ўтамиз, аввалроқ Каталониянинг “Барселона” жамоаси Мадрид клуби президенти Флорентино Пересни чемпионлик ва Негрейра иши юзасидан берган баёнотларидан сўнг уни судга беришни режа қилаётгани ҳақида хабар берилган эди.