“Бу ерда хўжайин менман”. Трамп G7 саммитига кечикиб борди (видео)

Бугун, 17 июнь куни АҚШ Президенти Дональд Трамп “Катта еттилик” (G7) саммитининг ривожланиш масалаларига бағишланган сессияларидан бирига кечикиб етиб борди. Бу ҳақда “Bloomberg” хабар берди.

Хонага кирар экан, Трамп ҳазил аралаш “Бу ерда хўжайин менман” (I'm the boss), деб айтган. Бу вақтда АҚШ Молия вазири Скотт Бессент Президент учун ажратилган жойни банд қилиб турган. Трамп агар хоҳласа, унга мажлисда қолишни таклиф қилган.

Саммит иштирокчилари АҚШ Президентининг кутаётган бир пайтда, у ўзининг ижтимоий тармоғида АҚШ Миллий разведкаси директори номзодининг Сенатда тасдиқланиши атрофидаги вазиятга бағишланган пост қолдиришга улгурган.

Маълумот учун, “Катта еттилик” (G7) ўз таркибига АҚШ, Буюк Британия, Германия, Франция, Италия, Канада ва Японияни бирлаштиради. Ушбу формат 1975 йилда глобал иқтисодий ва сиёсий масалаларни муҳокама қилиш майдончаси сифатида ташкил этилган. Еттита давлатдан ташқари, бирлашма ишида Европа Иттифоқи ҳам иштирок этади. Россия ушбу гуруҳга 1997 йилда қўшилган, шундан сўнг у “Катта саккизлик” (G8) деб атала бошлаган. 2014 йилда бирлашма доирасида Россия билан ҳамкорлик тўхтатилган ва формат яна G7 га қайтган.

Бу йил саммит Франциянинг Эвиан-ле-Бен шаҳрида 15–17 июнь кунлари бўлиб ўтмоқда. Трамп тадбирга у бошланган биринчи куниёқ учиб келган. Ташкилотга аъзо давлатлар раҳбарларидан ташқари, Франция Президенти Эмманюэль Макрондан Зеленский, шунингдек, Миср, Саудия Арабистони, Қатар ва БАА раҳбарлари ҳам таклифнома олган. Сиёсатчилар учрашувининг асосий мавзуларидан бири Украина масаласини ҳал қилиш бўйича умумий ёндашувни ишлаб чиқиш бўлган.

Бир кун аввал саммит доирасида БАА Президенти Муҳаммад бин Заид Ол Наҳайён билан бўлиб ўтган учрашувда Трамп хомашё нархи пасайгани сабабли АҚШ тез орада Россия нефтига нисбатан санкциялардаги енгилликларни бекор қилиши мумкинлигини маълум қилган. Бундан ташқари, сессиялардан бирида G7 давлатлари раҳбарлари Украинага қурол етказиб беришни кўпайтиришга келишиб олган. 

Эслатиб ўтамиз, аввалроқ Трамп G7 саммити доирасида сўзлаган нутқида Исроилнинг Ливандаги ҳарбий амалиётларини танқид қилиб, “Ҳизбуллоҳ” жангчиларини йўқ қилиш учун тураржой биноларини бомбардимон қилиш ортиқча эканини билдиргани ҳақида хабар берилган эди.