Бухорода нималар бўляпти? Яна бир талаба ўз жонига қасд қилди

Кеча, 27 апрель куни Бухоро давлат техника университетининг янги қурилган ётоқхонасининг 1-қаватида яшаб турган биринчи курс талабаси ўзини осиб, жонига қасд қилгани ҳақида хабар берган эдик. Бугун, 28 апрель куни ҳам ушбу университетнинг яна бир талабаси саҳар соатларида ўз жонига қасд қилган. Бу ҳақда QALAMPIR.UZ манбаси хабар бермоқда.

Манбага кўра, талаба Ф.Д. (эркак) талабалар тураржойида ўзини осиб ўлдирган. Ҳозирда ҳудуддан талабаларнинг чиқиши тақиқланган. Ётоқхона қабристон устида қурилгани айтилмоқда. Таҳририятга мурожаат қилган бошқа бир талабага кўра, ушбу сурункали суиқасдлар университет талабаларига қаттиқ таъсир қиляпти. Улар ҳар тонг ваҳима билан уйғонмоқда.

“Бизнинг руҳиятимизга жуда қаттиқ таъсир қиляпти бу. Катталар келиб ҳолатни ўрганиб, бунақа аянчли ишларни олдини олмайдими?! Ҳар бир талаба билан суҳбат қилиб, руҳий ҳолатини ўрганиш керакдир”, дейди мурожаатчи.

Бироқ QALAMPIR.UZ университет билан бўгланганда олий таълим муассасаси масъулларидан бири бўлиб ўтган суиқасд ҳолатида талабалар билан алоҳида ишлар олиб борилаётганини, ҳозирги кунда вазиятни янада чуқур ўрганиш ва талабаларнинг психологик ҳолатини яхшилаш мақсадида бир қатор тадбирлар ташкил этилаётганини билдирди.

“Жумладан, талабалар ўртасидаги психологик стрессни бартараф этиш ва руҳий ҳолатларини яхшилаш учун психологлар томонидан индивидуал ва гуруҳли суҳбатлар олиб борилмоқда. Талабаларнинг жисмоний ва руҳий саломатлигини сақлаш мақсадида, тегишли соҳа шифокорлари томонидан суҳбатлар ва маслаҳатлар ташкил этилмоқда. Шифокорлар талабаларга соғлиқни сақлаш, стрессни бартараф этиш бўйича тавсиялар бермоқда”, дейди университет масъули.

Ҳолатга аниқлик киритиш мақсадида QALAMPIR.UZ Бош прокуратура матбуот котиби Ҳаёт Шамсутдинов билан боғланди. Унинг маълум қилишича, ҳодиса ҳақиқатдан ҳам бугун, 28 апрель куни соат тахминан 06:20 лар атрофида содир бўлган. 

2005 йилда туғилган фуқаро Ф.Д. (2-босқич талабаси) номаълум сабабларга кўра Бухоро давлат техника университети қошидаги академик лицейида жойлашган спорт залининг том қисмига чиқиб, бўйин соҳасидан ўзини осиб, вафот этган. 

Мазкур ҳолат юзасидан Бухоро шаҳар прокуратураси томонидан терговга қадар текширув ҳаракатлари олиб борилмоқда.

Марҳумнинг Instagram'даги саҳифасига 27-28 апрель кунлари 3 маротаба ўз жонига қасд қилиш мазмунидаги лавҳаларни жойлагани аниқланган.

Эслатиб ўтамиз, ўтган йилнинг 6 декабрь куни ҳам Бухоро муҳандислик институти (ҳозирги Бухоро давлат техника университети)нинг 23 ёшли талабаси институт ётоқхонасида уксус ичиб, ўз жонига қасд қилган эди.