Эркин матбуотга босим бўляпти – BBC'нинг истеъфодаги раҳбари

Буюк Британиянинг BBC телеканалининг истеъфога чиққан бош директори Тим Дейви ходимларни руҳлантиришга ҳаракат қилиб, уларга хатолар қилган бўлсалар ҳам, ўз ишларини ҳимоя қилишлари кераклигини айтди. Бу ҳақда “Reuters” нашри хабар берди.

Қайд этилишича, Дейви ходимларга BBC билан фахрланишини билдириб, хатога йўл қўйилгани ва бу уларга қимматга тушганини таъкидлаган.

“Биз ноёб ва қимматли ташкилотмиз ва мен эркин матбуотга босим қилинаётганини, уни қурол сифатида ишлатиш ҳолатларини кўряпман,” дейди собиқ бош директор барча ходимлар йиғилишида.

Баъзи сиёсатчилар ва Буюк Британия матбуотининг айрим бўлимлари BBC'ни тарафкашликда айблаган. BBC'ни қўллаб-қувватловчилар бу танқидларни оммавий хизмат кўрсатувчи медиa устига йўналтирилган кенгроқ кампаниянинг бир қисми деб ҳисобламоқда. Маданият вазири Лиза Нэнди парламентда BBC'ни юқори журналистик стандартлар намунаси сифатида ҳимоя қилган.

“Факт ва фикр оралиғи хавфли даражада чалкашаётган бир вақтда... BBC бу тепаликдаги чироқдир”, деган у.

Халқаро сўровлар ва таҳлиллар компанияси YouGov сўрови шуни кўрсатдики, Дейви истеъфога чиққан кундан кейин британяликларнинг учдан бири BBC'ни чап қанот тарафкашлигида айблаган. Таҳлилчилар эса истеъфолар таҳририй стандартлар ва бошқарувдаги келишмовчиликларни очиб берганини, BBC жамоатчилик ишончини сақлай оладими деган саволларни юзага келтирганини айтган.

2020 йилдан бери бош директор бўлган Тим Дейви BBC'нинг келажаги бўйича хавотирларни камайтиришга ҳаракат қилган ва ходимларга: “BBC ривожланади ва мен жамоани тўлиқ қўллаб-қувватлайман,” деган. У истеъфога чиқишини ишнинг тинмсизлиги, BBC молиялаштириш модели бўйича кейинги текширувга тайёргарлик ва таҳририй хато сабаб деб тушунтирган.

BBC 1922 йилда ташкил этилган ва асосан телевизор эгалари тўлайдиган лицензия ҳақи орқали молиялантирилади. Ҳозир телеканал раҳбарсиз қолган, ҳукумат эса унинг молиялаштириш моделини текширмоқда. Жорий 10 йиллик молиялаштириш 2027 йилда тугайди. Нанди эса текширув кейинги ўн йиллик учун шартларни белгилаш мақсадида тез орада бошланишини билдирган.

Эслатиб ўтамиз, аввалроқ АҚШ Президенти Дональд Трамп Британиянинг BBC компаниясини унга нисбатан “ёлғон, туҳмат, ҳақоратли ва ғазаб уйғотувчи баёнотлар” берганликда айблаб, 1 миллиард долларгача зарар ундириш учун судга бериш билан таҳдид қилаётганди.