Эронда қурбонлар сони 3 919 кишига етди – HRANA

Эронда иқтисодий муаммолар туфайли бошланган норозилик намойишлари оқибатида ҳалок бўлганлар сони 3 919 кишига етди. 

Инсон ҳуқуқлари фаоллари янгиликлари агентлиги (Human Rights Activist News Agency, HRANA) хабарига кўра, тартибсизликлар чоғида 24 669 киши қўлга олинган. 

АҚШнинг Виржиния штатида жойлашган HRANA бир кун аввал Эронда норозилик намойишлари чоғида 3 308 киши ҳалок бўлгани ҳақида хабар берган эди. 

Эронда норозилик намойишлари

Эронда норозилик намойишлари 2025 йил 28 декабрь куни Теҳрондаги тарихий “Гранд-базар” бозорида авж олди. Дўкон эгалари миллий валютанинг хорижий валюталарга нисбатан кескин қадрсизланиши ва иқтисодий қийинчиликлар ортиб бораётгани сабабли норозилик намойишларини бошлади. Намойишлар тезда мамлакатнинг кўплаб шаҳарларига тарқалди. 

8 январь куни Теҳронда норозилик намойишлари кескинлашди. Тартибсизликлар давомида намойишчилар (жумладан, турли гуруҳлар) кўплаб объектлар – кўплаб автобуслар ва тез ёрдам машиналари, ўнлаб турар-жой бинолари, банклар, масжидлар, шифохоналар, шунингдек, бошқа давлат ва жамоат биноларига ўт қўйиб, вайрон қилган. Норозилик намойишлари кучайганидан сўнг Эрон ҳукумати интернетга кириш бўйича умуммиллий чеклов жорий қилди. 

Эрондаги намойишлар тўлқини пасайган бўлса-да, HRANA маълумотларни янгилашда давом этмоқда, янги тасдиқланган ҳолатларни қайд этмоқда ва ҳалок бўлганлар ва ҳибсга олинганлар сони ҳақидаги маълумотларни изчил ошириб бормоқда. 

Эрон расмийлари ҳозиргача тартибсизликлар чоғида ҳалок бўлганлар ва ярадорлар сони бўйича расмий статистикани эълон қилмаган. Шу билан бирга, аввалроқ Теҳронда расмий тузилмалар террорчилик ташкилотлари аъзолари ёки норозилик намойишларини ташкил этиш ва кучайтиришга алоқадор бўлган иғвогарлар деб атаган уч мингга яқин киши ҳибсга олингани ҳақида хабар берилган эди. 

Эрон олий раҳбари оятуллоҳ Али Хоманаий 17 январь куни норозилик намойишлари чоғида Исроил ва АҚШ билан боғлиқ шахслар мамлакатга катта зарар етказгани ва бир неча минг кишининг ўлимига сабаб бўлганини айтди.