“Эшигимни тагига ётиб олишади”. Хўжаев элчилардан хориж тажрибасини ўрганишни сўради (видео)

Бугун, 21 январь куни Ўзбекистон Республикаси элчилари ва импортёр тадбиркорлар ўртасида ўтказилган навбатдаги учрашувда Бош вазир ўринбосари Жамшид Хўжаев ташқи бозорларга чиқишга интилган тадбиркорлар муаммоларига элчилар ҳам бевосита жалб этилиши зарурлигини таъкидлади. Бу ҳақда учрашувда иштирок этаётган QALAMPIR.UZ журналисти хабар бермоқда.

Хўжаевнинг айтишича, Ўзбекистонда фаолият юритаётган хорижий давлатлар элчилари ўз мамлакатидан келган тадбиркор манфаати учун тинимсиз ҳаракат қилади. Улар масала юзага келса, вазирлик ва идоралар билан чекланиб қолмасдан, барча эшикларни қоқади, ҳатто Бош вазир ўринбосарининг қабулхонасигача боришдан тортинмайди.

“Керак бўлса, эшигим тагида ётиб олишади”, дея таъкидлади Хўжаев.

Унинг қўшимча қилишича, қайси йўналиш ёки мутахассис зарур бўлса, элчиларга топиб беришга шахсан тайёр.

Шунингдек, Бош вазир ўринбосари элчиларни “қуроллантириш” кераклиги, яъни улар аниқ далиллар, мустаҳкам аргументлар ва расмий ҳужжатлар билан ишлаши зарурлигини айтди. Масалаларни жойига бориб, юзаки эмас, тизимли ва қатъият билан ўрганиш талаб этилиши билдирилди.

Эслатиб ўтамиз, аввалроқ элчилар фаолият юритаётган давлатдан экспорт тушумлари, туристлар оқими, қонуний иш жойларига фуқароларни юбориш улар учун KPI бўлиши белгиланган эди.