Фақат Трамп Путинни урушни тўхтатишга мажбурлай олади – НАТО

НАТО Бош котиби Марк Рюттенинг фикрича, Украиндаги урушни тўхтатишга Россия Президенти Владимир Путинни фақат АҚШ Президенти Дональд Трамп мажбур қила олади. У бу ҳақда бугун, 28 декабрь куни Германиянинг “Bild” газетасига берган интервьюсида айтди.

Рюттенинг сўзларига кўра, Трамп “бу урушни якунлашга тўлиқ эътибор қаратган”.

“У Украиндаги урушни тугатмоқчи. Путинни музокаралар столига ўтиришга мажбур қила олган ягона инсон ҳам, охир-оқибат тинчликка рози қилишга қодир ягона шахс ҳам – Трамп”, деди НАТО Бош котиби.

Шу билан бирга, Рютте тинчликка эришиш учун муросалар керак бўлишини таъкидлади:

“Тинчлик шартномаларида доимо шундай бўлади”. 

Қайси томон қандай ён беришлари лозимлигини у аниқ айтмади.

Рюттенинг айтишича, Дональд Трамп Президент бўлганда АҚШ Украинани қўллаб-қувватлашни тўхтатади, деган хавотирларга у қўшилмайди. У, шунингдек, Трамп даврида АҚШ НАТОга содиқ қолишига ишонч билдирди ва Европа давлатлари Россия эҳтимолий ҳужумига қарши якка ҳолда қолиб кетмаслигини таъкидлади.

Нега урушни тугатиш қийин экани ҳақидаги саволга жавоб берар экан, Рютте шундай деди:

“Путин 1,1 миллион ўз фуқаросини қурбон қилишга тайёр. Шу билан бирга, жорий йилда Россия жуда кичик ҳудудий ютуқларга эришган”, деди у.

НАТО ҳисоб-китобларига кўра, Россия Украинанинг умумий ҳудудининг 1 фоизидан кам қисмини эгаллаган, холос. Аммо бунинг учун 1,1 миллионгача россиялик ҳарбий ҳалок бўлган ёки яраланган. Рюттенинг маълум қилишича, Россия армиясининг ойлик йўқотишлари тахминан 25 минг кишини ташкил қилади.

НАТО Бош котиби Украина учун Ғарб хавфсизлик кафолатларини ҳал қилувчи омил деб атади. Унинг сўзларига кўра, Путинни янги ҳужумдан тийиб тура оладиган учта асосий омил бор:

1. Украина Қуролли Кучлари – улар энг юқори даражада тайёр ҳолда бўлиши шарт.
2. Франция ва Буюк Британия бошчилигидаги “кўнгиллилар коалицияси” – Германия ва бошқа давлатлар иштирокида. Бу коалиция Украина армиясига қўшимча равишда зарур барча ёрдамни кўрсатади.
3. АҚШ – Америка Президенти август ойида Украина хавфсизлик кафолатларида иштирок этиш истагини билдирган.

Рюттенинг таъкидлашича, бу уч омил биргаликда “Минск-2” ёки эҳтимолий “Минск-3”дан мутлақо фарқ қилади:

“Бу – ҳақиқатан ҳам кучли хавфсизлик кафолатлари”, деди у.

Интервью давомида Рютте бир қатор Европа давлатлари Украинага тинчликпарвар қўшин юборишга тайёр эканини эслади. Айни пайтда Киев иттифоқчилари “кўнгиллилар коалицияси” учун аниқ концепцияни – қўшинларнинг жойлашуви, қуруқликда, денгизда ва ҳавода қандай ҳаракат қилиши масалаларини муҳокама қилаётганини билдирди.