FIFA Винисиусни ҳақоратлаган футболчини яна жазолади

FIFA “Бенфика”нинг аргентиналик ҳужумчиси Жанлука Престианнининг дисквалификациясини кенгайтирди. Жазо эндиликда унинг миллий терма жамоадаги ўйинларига ҳам татбиқ этилади. Бу ҳақда “The New York Times” нашри хабар берди.

Шу сабаб, агар у Аргентина терма жамоасига Жаҳон чемпионати учун жалб этилса, гуруҳ босқичидаги Жазоир ва Австрияга қарши иккита учрашувни ўтказиб юборади. Аввалроқ, UEFA футболчини Чемпионлар лигаси 1/16 финал босқичидаги “Реал”га қарши ўйинда Винисиус Жуниорга нисбатан ирқчилик қилгани учун 6 ўйинга дисквалификация қилган эди (шундан 3 таси шартли). Престианни ҳозиргача бир ўйинни ўтказиб юборган. 

20 ёшли ҳужумчи ҳозирча амалдаги жаҳон чемпионлари сафида атиги битта ўйин ўтказган. Шунингдек, у март ойида Мавритания ва Замбияга қарши ўртоқлик учрашувларига чақирилган эди.

Эслатиб ўтамиз, аввалроқ Канаданинг Ванкувер шаҳрида бўлиб ўтган махсус йиғилишда Халқаро футбол қоидалари кенгаши (IFAB) камситувчи ва ноўрин хатти-ҳаракатларни бартараф этиш учун иккита қоида маъқулланганди.