Францияда собиқ президентга коррупция иши бўйича электрон билагузук тақилди

Франциянинг собиқ президенти Николя Саркози 2021 йилда коррупция бўйича судлангани учун унга электрон билагузук ўрнатилди. Бу ҳақда “Le Monde” хабар берди.

Келгуси йил давомида 70 ёшли Саркози фақат эрталаб соат 8:00 дан 20:00 гача уйидан чиқиши мумкин. Унинг янги жиноят иши бўйича суд мажлислари ўтказиладиган кунларда бу муддат соат 21:30 гача узайтирилади. Нашр билагузук тақишни собиқ давлат раҳбарига нисбатан “мисли кўрилмаган чора” деб атайди.

2021 йил март ойида суд Саркозини 2014 йилда унинг 2007 йилги сайлов кампаниясини ноқонуний молиялаштириш бўйича тергов ҳақида маълумот олиш учун судьяга пора беришга урингани учун таъсир ўтказиш ва коррупцияда айбдор деб топди. Собиқ президентга бир йил ҳақиқий қамоқ жазоси ва икки йиллик синов муддати берилди, бироқ қамоқхона ўрнига унга озодликдаги жазони ўташга рухсат берилди, лекин электрон билагузук билан.

Аввалига у уч йилга озодликдан маҳрум этилган, бироқ ҳукм шартли бўлган. Саркози ҳукм устидан Париж Апелляция судига шикоят қилди, бироқ 2023 йилнинг май ойида ютқазди. 2024 йилнинг декабрида эса қарор Кассация суди томонидан ўз кучида қолдирилди. Собиқ президент ўзининг айбсизлигини таъкидламоқда, унинг адвокатлари эса Инсон ҳуқуқлари бўйича Европа судига шикоят қилиш ниятида.

Январь ойида суд Саркозига қарши яна бир ишни кўриб чиқишни бошлади. У Муаммар Қаддафий бошчилигидаги Ливия бюджетидан 2007 йилги сайлов кампаниясини ноқонуний молиялаштирганликда айбланмоқда. 2011 йилда Ливияга хорижий интервенциянинг энг очиқ тарафдорларидан бири бўлган Саркози ўз айбини рад этади.

Саркози 2007 йилдан 2012 йилгача Франция президенти бўлган. У иммиграцияга қарши қатъий сиёсати ва глобал молиявий инқироздан қаттиқ жабр кўрган Франция иқтисодиётини ислоҳ қилиш ҳаракатлари билан ёдда қолган.

Эслатиб ўтамиз, аввалроқ Франция кассация суди 2021 йил март ойида собиқ президент Николя Саркозини коррупция ва судьяга пора беришга уринишда айблаб, чиқарилган ҳукмни ўз кучида қолдирганди. У электрон билагузук тақиб, бир йилни уй қамоғида ўтказиши керак эди.