Гаттузо Италия терма жамоаси бош мураббийлигидан кетиши кутилмоқда

Италия миллий терма жамоаси бош мураббийи Женнаро Гаттузо ўз лавозимини тарк этиши кутилмоқда. Бу ҳақда журналист Фабрицио Романо хабар берди.

Манбага кўра, Гуттузонинг ўрнига асосий номзодлар сифатида Массимилиано Аллегри ва Антонио Конте кўриб чиқилмоқда. Шунингдек, жамоа делегацияси раҳбари, 2006 йил жаҳон чемпиони Жанлуиджи Буффон ҳам ўз вазифасини тарк этиши мумкин.

48 ёшли Гаттузо Италия терма жамоасини 2025 йил июнь ойидан бошлаб бошқариб келаётган эди. Унинг қўл остида жамоа Жаҳон чемпионати саралаш босқичи плей-офф финалида Босния ва Герцеговинага пенальтилар сериясида мағлуб бўлди. Натижада италияликлар учинчи марта кетма-кет мундиалда иштирок эта олмайдиган бўлди.

Маълумот учун, Гаттузо мураббийлик фаолияти давомида Хорватиянинг “Хайдук”, Италиянинг “Палермо”, “Пиза”, “Милан”, “Наполи”, Швейцариянинг “Сьон”, Грециянинг ОФИ, Испаниянинг “Валенсия” ҳамда Франциянинг “Марсель” клубларида ишлаган. Унинг бошқарувида “Наполи” 2020 йилда Италия Кубогини қўлга киритган.

Рамазон Усанов