ИИБ ходими машинада уриб юборган эркакнинг жасади 80 кунда топилди

Тошкент вилояти Бекобод туман Ички ишлар бўлими Жиноят қидируви бўлими тезкор ходими автомашинада уриб юборган 43 ёшли эркакнинг жасади 80 кундан кейин топилди. Бу ҳақда марҳумнинг яқинлари маълум қилди.

Воқеа 2025 йилнинг 11 декабрь куни Бекобод тумани “Қорақуйли” маҳалла ҳудудидан ўтган “Қорасув-Бўка-Бекобод” автомобиль йўлининг 64-километрида содир бўлган.

Бекобод шаҳар ИИБнинг катта тезкор вакили маст ҳолатда оқ рангли Nexia-3 русумли автомашинада 43 ёшли пиёдани уриб юбориб, йўл-транспорт ҳодисаси содир этган. Ушбу автоҳалокат оқибатида эркак вафот этган.

Сўнг ИИБ ходими жиноят изини яширишга уриниб, хотинига қўнғироқ қилган ва Matiz’да у айтган жойга етиб келишини тайинлаган. Сўнг жасадни ўзининг Nexia’сидан Matiz’га олиб ўтган. Уни воқеа жойидан, тахминан, 35-40 км узоқликдаги “Дўстлик” каналига оқизиб юборган.

2025 йилнинг 12 декабрь кунидан бошлаб эркакнинг жасади махсус бўлим ходимлари томонидан қидирилган. Қарийб 80 кун ўтиб унинг жасади сувга ташланган жойдан 4-5 км узоқликдан топилган. Яқинлари жасадни тасдиқлаган.

Эслатиб ўтамиз, аввалроқ Хоразм вилоятида маст ҳолда одам юбориб, унинг ўлимига сабабчи бўлган Ички ишлар бошқармаси инспектори 3 йил-у 1 ойга озодликдан маҳрум этилган эди.