Инфантинонинг “Тинчлик кенгаши”га яқинлиги ХОҚ танқидига сабаб бўлди

Халқаро Олимпия қўмитаси (ХОҚ) FIFA президенти Жанни Инфантинонинг “Тинчлик кенгаши” йиғилишида иштирок этганини кўриб чиқади. Бу ҳақда кеча, 20 февраль куни ХОҚ президенти Кирсти Ковентри Олимпия ўйинлари юзасидан ўтказилган матбуот анжуманида маълум қилди.

Жорий йилнинг 19 февраль куни Вашингтонда Ғазо секторидаги можарони ҳал этишга қаратилган  “Тинчлик кенгаши”нинг илк йиғилиши бўлиб ўтди. Инфантино тадбирда “USA” ёзуви ва 45-47 рақамлари туширилган қизил кепкада иштирок этди.

Ковентри эса Инфантинонинг ушбу тадбирда қатнашганидан бехабар бўлганини айтди.

“Бизнинг позициямиз – сиёсий жиҳатдан бетараф бўлиб қолиш. Ташкилот сифатида мусобақалар яхлитлигини таъминлашнинг ягона йўли ҳам шу, деб ҳисоблайман”, дейди Ковентри.

ХОҚ президенти, шунингдек, “Олимпия Хартияси ХОҚ аъзоларидан нимани кутишини жуда аниқ белгилаб берганини” таъкидлаган.

Инфантино йиғилишда FIFA ва “Тинчлик кенгаши” ўртасидаги ҳамкорлик шартномасини тақдим этди. Унга кўра, Ғазода 50 та мини-майдон, бешта тўлиқ ўлчамли стадион, футбол академияси ҳамда 20 минг ўринли янги стадион қуриш режалаштирилган.

“Reuters”га кўра, Олимпия Хартиясига биноан ХОҚ аъзолари тижорат ва сиёсий манфаатлардан мустақил ҳаракат қилиши шарт. Шунингдек, улар ҳукуматлар ёки бошқа ташкилотлардан ўз ҳаракат эркинлиги ва овоз беришига таъсир кўрсатиши мумкин бўлган кўрсатмаларни қабул қилмасликлари лозим. Маълумот учун, Инфантино 2020 йилда ХОҚ аъзосига айланган.