Ироқ парламенти янги Президентни сайлади

Бугун, 11 апрель куни Ироқ парламенти “Курдистон ватанпарварлар иттифоқи” (КВИ) номзоди Низор Муҳаммад Саид Омидийни мамлакатнинг янги Президенти этиб сайлади. Бу ҳақда INA хабар берди.

Ироқ парламенти баёнотида қайд этилишича, Омидийнинг Президент этиб сайланиши учун 227 та овоз берилган. 

“Иккинчи номзод, депутат Мутанна Амин Нодир 15 та овоз олди. Еттита бюллетень ҳақиқий эмас деб топилди”, дея аниқлик киритган парламент.

Бунгача Ироқ парламенти матбуот хизмати 2022 йил октябрь ойида сайланган мамлакат президенти Абдул Латиф Рашид давлат раҳбари лавозимига ўз номзодини қўйишдан воз кечганини маълум қилган. У рўйхатдан чиқарилгач, ушбу лавозимга 16 нафар даъвогар қолган.

Маълумот учун, Низор Омидий – Ироқнинг собиқ атроф-муҳит вазири. 2024 йилдан буён КВИнинг Бағдоддаги офисини бошқариб келади. 2003 йилдаги сиёсий келишувларга кўра, Ироқ президенти этник курд, бош вазир шиа, парламент спикери эса сунний бўлиши керак.

Эслатиб ўтамиз, аввалроқ Мьянма парламенти инқилобчи ва ҳарбий ҳунта етакчиси генерал Мин Аун Ҳлайнни мамлакат Президенти этиб сайлаганди.