Исмоилов КХДРга қарши ҳужумкор ўйин ваъда қилмоқда

Ўзбекистон ўсмирлар терма жамоаси бош мураббийи Ислом Исмоилов 17 апрель куни Осиё кубоги ярим финали доирасида ўтказиладиган Корея Халқ Демократик Республикасига (КХДР) қарши баҳс олдидан матбуот анжуманида иштирок этиб, ўз фикрлари билан ўртоқлашди.

“Рақибимиз бу босқичга қадар яхши ўйин намойиш этди. КХДР юксак жисмоний тайёргарликка эга жамоа. Ушбу жамоанинг турнирдаги ўйинларини таҳлил қилганимизда, 90 дақиқа давомида тинимсиз прессингда ишлаётганига гувоҳ бўлдик. Бир қанча тактик хатолар ҳам кузатилган, бироқ уларга қарши осон ўйин бўлмаслиги аниқ. Ўз имкониятларимиздан фойдаланиб, ғалаба қозонишга ҳаракат қиламиз”, дейди Исмоилов.

Исмоилов турнир давомида Ўзбекистон ўсмирлар жамоаси кўрсатаётган ўйин ва футболчилар мотивацияси ҳақида ҳам тўхталиб ўтди.

“Мусобақа давомида кўрсатаётган ўйинимиз фақат мотивация самараси эмас, мураббийлар штаби ва жамоа шифокорлари катта ҳажмда меҳнат қилмоқда. Тоиф шаҳри денгиз сатҳидан деярли 1900 метр баландликда жойлашган. Бу ерда футбол ўйнаш осон эмас. Футболчилар доимий равишда интенсив ва юқори даражада ўйнай олишлари учун биринчи навбатда тўғри тайёргарлик муҳим ўрин тутади. Ҳар бир учрашувдан олдин ва кейин футболчиларимиз билан ҳам тактик, ҳам психологик суҳбатлар ўтказамиз. Эришаётган натижаларимиз жамоа меҳнати самарасидир”, дейди мураббий.

Мутахассис ҳар икки жамоа мусобақада кўп гол ураётгани ҳақида ҳам фикрларини билдирди.

“Икки ҳужумкор жамоа ўйинига гувоҳ бўламиз. Бизнинг ўз стратегиямиз ва танлаган йўлимиз бор. Мақсадимиз доим ҳужумкор футбол намойиш этиш. Ўз ҳимоямизни рақибнинг учинчи зонасида қуришга ҳаракат қиламиз. Бу шуни англатадики, жамоамиз доимий равишда юқори прессингда ҳаракат қилади. Биз йиллар давомида айнан шу услуб учун ҳаракат қилдик. Ҳар қандай рақибга қарши ўйин услубимизни ўзгартирмаймиз. Тўғри, ўйиннинг боришига қараб футболчиларнинг майдондаги ҳаракатларига бироз ўзгартиришлар киритишимиз мумкин. Лекин асосий ғоямиз ўзгармайди. Шу билан бирга, рақибнинг кучли ҳужум чизиғини тўхтатишга ва ўзлари учун қулай услубда ҳаракат қила олмаслиги учун ҳаракат қиламиз”, дейди Исмоилов.

Маълумот учун, Ўзбекистон-КХДР ўйини 17 апрель куни 22:15 да старт олади. Учрашувга Тоиф шаҳридаги “Қирол Фаҳд” стадиони мезбонлик қилади.