Исроил Эронга қарши ёлғиз қолиши мумкин – Трамп

АҚШ Президенти Дональд Трамп Исроил Бош вазири Биньямин Нетаньяху билан сўнгги 24 соат ичида бўлиб ўтган телефон суҳбатида уни Эронга қарши ҳарбий ҳаракатларни кенгайтирмасликка чақирган. Бу ҳақда у N12 телеканалига берган интервьюсида маълум қилди.

Трампнинг айтишича, агар Исроил ҳужумлари кенг кўламли урушга айланиб кетса, Тель-Авив Эронга қарши курашда ёлғиз қолиши мумкин.

“Нима қилаётганингда жуда эҳтиёт бўлишинг керак, чунки тез орада Эронга қарши ёлғиз қолиб кетишинг мумкин”, дея Трамп Нетаньяхуни огоҳлантирган.

Шунингдек, Трамп кеча, 8 июнь куниги суҳбат давомида Исроил раҳбаридан Эроннинг ракета ҳужумларига жавоб зарбалари бермасликни сўраганини айтган. Бироқ суҳбат якунида Нетаньяху қандай қарор қабул қилиши ҳақида аниқ жавоб бермаган.

Маълум бўлишича, суҳбатдан кейин Нетаньяху Исроил мудофаа тизими раҳбарлари билан маслаҳатлашувлар ўтказган ва кейинчалик АҚШ давлат котиби Марко Рубиога Эронга ҳужум қилиш тўғрисида қарор қабул қилганини маълум қилган.

Трампнинг сўзларига кўра, АҚШ Исроилнинг режалари ҳақида жуда кеч хабардор қилинган.

“Исроилликлар бизга жуда кеч босқичда маълумот берди. Улар аллақачон Эрон томон йўл олган эди. Мен ҳужум кўламини камайтиришга муваффақ бўлдим”, дейди у.

Трамп минтақадаги бир қатор давлатлар Вашингтондан Нетаньяхуга босим ўтказиб, ҳужумларни тўхтатиш ва дипломатик келишувга эришишга ёрдам беришни сўраганини ҳам маълум қилган. Шунингдек, Эрон ҳам Вашингтон билан боғланиб, Исроилга янги ҳужумлар қилмаслигини билдирган ва АҚШдан Исроил зарбаларини ҳам тўхтатишга ёрдам беришни сўраган.

“Бугун эрталаб эронликлар биз билан боғланди ва энди Исроилга ҳужум қилмасликларини айтди. Улар биздан Исроилга ҳужумларни тўхтатишни сўрашди”, деган Трамп.

Шу билан бирга, АҚШ Президенти Дональд Трамп Эрон билан эҳтимолий келишувга эришиш имконияти сақланиб қолаётганини таъкидлаган. Унинг фикрича, Теҳрон ҳам бундай битим имзолашдан манфаатдор ва томонлар ўртасида мақбул келишувга эришиш имконияти ҳали ҳам мавжуд.