Қотиллик учун 22 йилга қамалган дарвозабон катта футболга қайтди

Модель Элизи Самудионинг шафқатсизларча ўлдирилишида айбдор деб топилган ва 22 йилга озодликдан маҳрум қилинган бразилиялик дарвозабон Бруно Фернандес профессионал футболга қайтмоқда. У Бразилиянинг “Васко да Гама” жамоаси билан шартнома имзолади.

Маълумотларга кўра, 41 ёшли дарвозабонни “Вело Клубе”га қарши Бразилия Кубоги ўйини учун таркибга расман киритган. 2019 йилдан буён ярим очиқ режимдаги жазони ўтаб келаётган футболчи катта футболга қайтди.

Маълумот учун, Бруно Фернандес 2010 йилда “Фламенго” сардори бўлган пайтда  модель Элизи Самудионинг йўқолишидан сўнг асосий гумондор сифатида ҳибсга олинган.

Тергов маълумотларига кўра, можаро оталик ва алимент масаласи юзасидан келиб чиққан. Самудио футболчидан ҳомиладор бўлганини айтиб, фарзандни тан олиш ва моддий ёрдам кўрсатишни талаб қилган.

Ўша даврда Брунонинг “Милан”га эҳтимолий трансфери муҳокама қилинаётган бўлган ва суд жараёнлари унинг обрўсига ҳамда трансфер истиқболига таъсир кўрсатган.

Шунингдек, Самудио полицияга мурожаат қилиб, футболчи қурол ишлатганини ҳамда уни аборт қилишга мажбурлашга уринганини даъво қилгани ҳақида ҳам хабарлар тарқалган, бироқ бу маълумотлар кейинги тергов жараёнида алоҳида эпизод сифатида кўриб чиқилган.

Терговга кўра, 2010 йил июнь ойида Бруно Самудиони алимент масаласини муҳокама қилиш баҳонасида фермасига таклиф қилган. У ерда у ўғирлаб кетилган, қийноққа солинган ва ўлдирилган. Кейинчалик жасад йўқ қилинган.

2013 йилда суд Бруно Фернандесни айбдор деб топиб, уни 22 йилдан ортиқ муддатга озодликдан маҳрум қилган. Сўнгра жазо ярим очиқ режимга ўзгартирилган, бу эса унга машғулот ўтказиш ва футбол фаолиятини тиклаш имконини берган.