Канада Бош вазири Трампдан узр сўради

Канада Бош вазири Марк Карни кеча, 1 ноябрь куни АҚШ Президенти Дональд Трампдан тарифларга қарши сиёсий реклама учун узр сўраганини ва Онтарио бош вазири Даг Фордга уни намойиш қилмасликни айтганини маълум қилди.

Жанубий Кореяда бўлиб ўтган Осиё-Тинч океани саммитида қатнашганидан кейин журналистлар билан суҳбатлашган Карни, 29 октябрь куни Жанубий Корея Президенти томонидан уюштирилган кечки овқатда Трампдан шахсий равишда узр сўраганини айтди.

"Мен Президентдан узр сўрадим", деди Карни бундан кун Трампнинг айтганларини тасдиқлаб.

Карни шунингдек, рекламани Форд билан эфирга узатишдан олдин кўриб чиққанини, аммо ундан фойдаланишга қарши бўлганини айтди.

“Мен Фордга рекламани давом эттиришни хоҳламаслигимни айтдим”, деди у.

Баъзан Трамп билан таққосланадиган консерватив сиёсатчи Форд томонидан буюртма қилинган рекламада республикачи тимсол ва собиқ президент Рональд Рейганнинг тарифлар савдо урушлари ва иқтисодий фалокатларга олиб келиши ҳақидаги парчаси ишлатилган. Бунга жавобан Трамп Канададан товарларга тарифларни ошираётганини эълон қилди ва Вашингтон Канада билан савдо музокараларини тўхтатди.

Шу ҳафта бошида Жанубий Кореядан жўнаб кетаётганда, Трамп ўша кечки овқатда Карни билан “жуда ёқимли” суҳбатлашганини таъкидлади, аммо бу ҳақда батафсил маълумот бермади. 31 октябрь куни Трамп ҳали ҳам Қўшма Штатлар ва Канада савдо музокараларини қайта бошламаслигини айтди.

Карнининг айтишича, 31 октябрь куни Хитой раиси Си Цзиньпин билан бўлиб ўтган музокаралари йиллар давом этган кескинликдан кейин муносабатларда бурилиш нуқтаси бўлган. Канада ва Хитой раҳбарлари ўртасидаги сўнгги расмий учрашув 2017 йилда, ўша пайтдаги бош вазир Жастин Трюдо Сан-Францискодаги учрашувда Си билан қисқа суҳбатлашганида бўлиб ўтган.

Сўнгги йилларда Канада фуқаролари Хитойда ҳибсга олинган ва қатл этилган ҳамда Канада хавфсизлик идоралари Хитой камида иккита федерал сайловга аралашган деган хулосага келган.

Карнининг айтишича, у Си билан бошқа масалалар қатори хорижий аралашувни ҳам муҳокама қилган. 

“Осиёга сафар Канаданинг Қўшма Штатларга қарамлигини камайтиришга қаратилган саъй-ҳаракатларнинг бир қисми бўлган. Бу бир кечада содир бўлиши мумкин эмас, лекин биз жуда тез ҳаракат қиляпмиз, деди Карни.