Канадалик ошпаз суицид учун юзлаб ёшларга захар сотганини тан олди

Канадалик Кеннет Лоу интернет орқали ўз жонига қасд қилиш мақсадида ишлатиладиган кимёвий моддаларни сотганини тан олди. У бу ҳақда кеча, 29 май куни Онтарио провинциясининг Ньюмаркет шаҳрида бўлиб ўтаётган суд жараёнида маълум қилди.

Лоу аввалроқ ушбу кимёвий моддаларни қабул қилиб ўз жонига қасд қилган 14 нафар ўсмирнинг ўлими бўйича қотилликда айбланаётган эди. Бироқ у ўз жонига қасд қилишга ундаш ёки ёрдам бериш айбини тан олганидан сўнг, қотилликка оид айбловлар бекор қилинди. Суд ҳукми сентябрь ойида эълон қилиниши кутилмоқда.

Тергов маълумотларига кўра, собиқ ошпаз бўлган Лоу интернет орқали гўштни консервлашда қўлланадиган кимёвий моддани реклама қилиб, сотган. Бу модда инсон организмига катта миқдорда тушганда ўлимга олиб келиши аниқланган. Ҳуқуқни муҳофаза қилувчи органлар Лоу дунёнинг турли мамлакатларида яшаган 100 дан ортиқ кишининг ўз жонига қасд қилишига алоқадор бўлиши мумкинлигини тахмин қилмоқда. У 2023 йил май ойидан бери қамоқда сақланмоқда.

Канада қонунчилигига кўра, ўз жонига қасд қилишга ундаш ёки бунга ёрдам бериш учун 14 йилгача озодликдан маҳрум қилиш жазоси белгиланган. Агар Лоу қотилликда айбдор деб топилганида, унга шартли озодлик ҳуқуқисиз 25 йилгача қамоқ жазоси тайинланиши мумкин эди.

Ҳукумат статистикасига кўра, ҳар йили Канадада тахминан 4500 киши ўз жонига қасд қилиш натижасида вафот этади ва ҳар куни Канадада 200 дан ортиқ одам ўз жонига қасд қилишга уринади. Канадада 2016 йилдан бери оғир ва даволаб бўлмайдиган касаллик ёки ногиронлик туфайли кучли жисмоний ёки руҳий азоб чекувчи вояга етган фуқаролар учун қонунан тартибга солинган тиббий ёрдам асосида ҳаётни тугатиш – эвтаназия амалиётига рухсат берилган. Бироқ, вояга етмаганларни ўз жонига қасд қилишга ундаш эса, жиноят ҳисобланади.

Эслатиб ўтамиз, аввалроқ Instagram ўсмирлар суицид ёки ўзини жароҳатлашга оид атамаларни қисқа вақт ичида такроран қидирса, ота-оналарга хабар беришни бошлаши ҳақида хабар қилинган эди.