Хонанда Рианнанинг уйи ўққа тутилди (видео)

АҚШнинг Лос-Анжелес шаҳрида америкалик хонанда Рианнанинг уйи машина ичидан туриб ўққа тутилди. Ҳодиса содир бўлган вақтда хонанда уйда бўлган. Бу ҳақда Лос-Анжелес полициясига таяниб, NBC News хабар берди.

Қайд этилишича, кеча, 8 март куни тушдан кейин Рианнанинг Беверли-Хиллз яқинидаги уйига бир аёл бошқараётган машина яқинлашган. Ҳуқуқ-тартибот идоралари талқинига кўра, гумонланувчи милтиқдан ўт очган. Тўртта ўқ ёки уларнинг парчалари бинонинг бир қисмига теккан. Ҳодиса оқибатида ҳеч ким жабрланмаган.

Ўқ узганликда гумон қилинган аёл қўлга олинган. Ҳозирча унинг исми ошкор этилмаган. Қайд этилишича, ҳип-ҳоп юлдузи A$AP Рокки хонанда билан бирга яшайди. Рианна воқеа пайтида уйда бўлган бўлса-да, ўша пайтда A$AP Рокки ёки жуфтликнинг фарзандлари ичкарида бўлганми ёки йўқми номаълум.

Ўқ узиш иши бўйича терговни Лос-Анжелес полиция департаментининг талончилик ва қотилликларни тергов қилиш бўйича элита бўлинмаси олиб бормоқда.

Эслатиб ўтамиз, аввалроқ АҚШ Махфий хизмати 20 ёшли эркакни Флорида штатидаги Мар-а-Лаго қароргоҳи ҳудудига рухсатсиз киришга урингани учун отиб ўлдирганди. Ҳодиса вақтида қароргоҳда ҳеч ким бўлмаган, Президент Дональд Трамп Вашингтонда бўлган.