Клопп Жаҳон чемпионатининг очилиш ўйинини танқид қилди

Машҳур немис мураббийи Юрген Клопп 2026 йилги Жаҳон чемпионатининг очилиш учрашуви – Мексика ва Жанубий Африка терма жамоалари ўртасидаги баҳсни танқид қилди. Бу ҳақда Клопп “MagentaTV” дастурида айтиб ўтди. 

Мехико шаҳрида бўлиб ўтган учрашув мезбонларнинг 2:0 ҳисобидаги ғалабаси билан якунланган эди. Клоппнинг айтишича, мазкур ўйинни юқори савиядаги баҳс деб аташ қийин.

“Тактик жиҳатдан ўйин менда катта таассурот қолдирмади. Ҳар икки жамоа ҳам муайян вақтларда яхши ҳаракат қилди. Бироқ Мексика ташаббусни қўлга олган пайтларда ўйин тез-тез қарши ҳужумларга ўтиб кетди. Бунинг сабаби Жанубий Африка ҳимоячиларининг жуда чуқур жойлашганида эди. Бу ҳолат деярли бутун ўйин давомида такрорланди. Шу боис мен бу баҳсни юқори даражадаги ўйин деб атай олмайман”, дейди Клопп.

Маълумот учун, Жаҳон чемпионатининг очилиш учрашувида Мексика терма жамоаси Жанубий Африкани 2:0 ҳисобида мағлуб этди. Голларга Хулиан Киньонес ва Рауль Хименес муаллифлик қилди.