Коста-Рика тарихида иккинчи бор аёл президент сайланди

Кеча, 1 февраль куни Лаура Фернандес Коста-Рикадаги президентлик сайловларида жиноятчиликка қарши қатъий сиёсатни тарғиб қилган платформа билан ғалаба қозонди. Бу ҳақда “The New York Times” хабар берди.

39 ёшли сиёсатчи Лаура Фернандес Коста-Рика тарихида президент бўлган иккинчи аёлга айланди. 2022 йилдан бери мамлакатни бошқариб келаётган президент Родриго Чавеснинг машҳурлигидан унумли фойдаланган Фернандес сайловнинг биринчи босқичидаёқ ғалаба учун зарур бўлган чегарадан ошган. Сўнгги ўн йилдан ортиқ вақт ичида бундай натижага ҳеч бир президентлик номзоди эриша олмаган эди.

Дастлабки натижаларга кўра, у деярли 50 фоиз овоз тўплаган. Унинг энг яқин рақиблари – бир технократ ва собиқ биринчи хоним – мос равишда 33 фоиз ва тахминан 5 фоиз билан анча ортда қолган. 1 февраль куни маҳаллий вақт билан кечга бориб, мамлакатдаги бюллетенларнинг қарийб 85 фоизи санаб чиқилган.

Мамлакат сайлов органи ўтган йили Чавес ўз лавозимидаги ваколатларидан Фернандес фойдасига ташвиқот олиб бориш учун фойдаланганини аниқлаган эди. Конституцияга кўра, бундай амалиёт тақиқланган. Чавес кетма-кет муддатга қайта сайлана олмасди, бироқ янги ҳукумат таркибида муҳим лавозимлардан бирини эгаллаши эҳтимол қилинмоқда.

Фернандес дастлабки натижалар эълон қилингач телевидение орқали бўлиб ўтган видеоқўнғироқда ўз устозига мурожаат қилган.

“Биринчи кундан бошлаб менга ишончингизни билдирдингиз, менга ишондингиз ва бугун Коста-Риканинг сайланган президенти бўлишим учун менинг хизматларимни қадрлаб, менга умид бердингиз”, дейди Чавес маъмуриятининг собиқ расмийси бўлган Фернандес.

Унинг ғалабаси билан Чавеснинг популистик ҳаракати – экспертлар томонидан Олий судни қайта шакллантириш ва назорат қилувчи идоралар фаолиятига тўсқинлик қилиш орқали мамлакат институтларининг бир қисмини емиришга киришган сиёсий оқим сифатида баҳоланувчи бу клан камида яна тўрт йил ҳокимиятда қолади.

Фернандеснинг тез кўтарилиши Лотин Америкаси бўйлаб кузатилаётган умумий тенденцияга мос келади: хавфсизлик сайловчилар учун энг муҳим масалага айланар экан, номзодлар жиноятчиликка қарши “темир қўл” сиёсатини ваъда қилмоқда.

Бир пайтлар Марказий Америкадаги энг тинч мамлакат бўлган Коста-Рика ҳозирда трансмиллий наркотрафик сабаб кучайган зўравонлик билан юзлашмоқда. 2023 йилдан буён мамлакатда ҳар йили қарийб 900 та қотиллик қайд этилмоқда – бу кўрсаткич Чавес 2022 йилда лавозимга келишидан аввалги даврга нисбатан тахминан 50 фоизга юқори.

Маълумот учун Лаура Фернандесга қадар 2010 йилдан 2014 йилгача Лаура Чинчилла мамлакат тарихида президент бўлган биринчи аёл сифатида эсланади.

Эслатиб ўтамиз, аввалроқ Болгарияда мамлакат тарихида илк марта давлат раҳбари ваколатлари аёл сиёсатчи Илияна Ётовага ўтган эди.