Лукашенко Путинни суиқасд ҳақида огоҳлантирганини айтди

Беларусь резиденти Александр Лукашенко Россия Президенти Владимир Путинни Жанубий Африка Республикасига (ЖАР) сафари чоғида унга қарши суиқасд бўлиши мумкинлиги ҳақида огоҳлантирганини айтди. Бу ҳақда у 2025 йил 31 декабрь куни журналистлар билан суҳбати чоғида сўз очди.

Лукашенконинг сўзларига кўра, Путин “чамадонларини йиғаётган” пайтида у билан “дўстона, биродарларча суҳбат” ўтказган ва ЖАРга – BRICS саммитига кетишга отланган Путинни фикридан қайтарган. Шундан сўнг, Россия етакчиси бу масалага қулоқ солган ва саммитга Россия Ташқи ишлар вазири Сергей Лавров учиб кетган.

Шунингдек, Лукашенко бу “оддий бемаъни гап-сўз эмас”лигини, Путинга қарши тайёрланаётган “террорчилик ҳаракати” ҳақида разведка маълумотларига эга бўлганини айтган.

“Бизни разведкамиз хабардор қилган”, дейди у.

Лукашенконинг сўзларига кўра, Украина билан уруш давом этаётган бир пайтда у Путинга тез-тез ҳеч қаерга бормасликни маслаҳат беради, чунки “керак бўлганлар ўзлари унинг олдига учиб келади”.

“Аниқки, Ғарбда ҳамма тушунади: Путинни йўқ қилишса, ҳаммаси бошқача бўлади. Бунга жиддий қараш керак. Мен бу ҳақда бугун биринчи марта гапиряпман, чунки бепарволик қилиш мумкин эмас”, дейди Лукашенко.

Шунингдек, у Путиннинг Валдайдаги қароргоҳига Украина дронлари ҳужум қилишга урингани ҳақидаги воқеани “энг ёввойи терроризм” деб атаган. Лукашенконинг эслатишича, кенг кўламли уруш бошланганидан буён томонларнинг ҳеч бири бошқа томоннинг биринчи шахсига ҳужум қилмаган, ҳолбуки Путиннинг Киевдаги “қарор қабул қилиш марказлари”га зарба бериш имконияти бўлган.

“Мен айнан шуни ўйлаяпман: бу кимга керак эди, бу нимага олиб келиши мумкин эди. Кимга кераклигини тахмин қиляпман, Владимир Александрович Зеленский ортида ким турганини ҳам. Ўйлайманки, агар у бунга алоқадор бўлган бўлса ҳам нима қилаётганини тушунмаган”, дейди Лукашенко.

Зеленскийнинг ўзи эса Россиянинг дронлар ҳужуми ҳақидаги баёнотини “фейк” деб атади. Унинг сўзларига кўра, Москва шу йўл билан Киевдаги ҳукумат биноларига зарба бериш учун замин ҳозирламоқда ва Украина ҳамда АҚШ ўртасидаги тинчлик музокараларида эришилаётган силжишни издан чиқаришни, урушни тўхтатишдан бош тортишини оқлашни кўзламоқда.

Ростлиги ноаниқ ҳужум

Россия Ташқи ишлар вазири Сергей Лавров Киев 2025 йилнинг 29 декабрь куни кечаси Путиннинг Новгород вилоятидаги давлат қароргоҳига 91 та учувчисиз учиш аппарати ёрдамида ҳужум уюштирганини хабар қилди. Барча дронлар йўқ қилинди. Вазир қурбонлар ёки зарар ҳақида ҳеч қандай маълумот йўқлигини айтди. 

Ўз навбатида, Россия Президенти ёрдамчиси Юрий Ушаковнинг хабар беришича, Путин телефон орқали суҳбатда АҚШ Президенти Дональд Трампнинг эътиборини Киевнинг Мар-а-Лагода бўлиб ўтган АҚШ-Украина музокараларидан сўнг деярли дарҳол содир бўлган ҳужумига қаратган ва бу энг жиддий жавобсиз қолмаслиги ҳақида огоҳлантирган. Россия раҳбари шунингдек, Америка раҳбарига Украинадаги можарони ҳал қилиш бўйича музокаралардаги Россиянинг позицияси қайта кўриб чиқилишини айтган.

АҚШ Марказий разведка бошқармаси эса Украинани Россия Президенти Владимир Путиннинг Новгород вилояти – Валдайдаги қароргоҳига ҳужум қилишга уринган, деб ҳисобламайди. МРБ хулосасига кўра, 29 декабрга ўтар кечаси украин дронлари Путиннинг қароргоҳи жойлашган ҳудуд билан бир минтақадаги ҳарбий объектга зарба беришга уринган, бироқ ушбу объект қароргоҳга яқин жойлашмаган.

МРБ директори Жон Рэтклифф разведка хулосаларини АҚШ Президенти Дональд Трампга етказган. Орадан кўп ўтмай, Трамп ўзининг Truth Social ижтимоий тармоғида “New York Post” газетасининг таҳририй мақоласига ҳавола эълон қилган. Унда Украина Путиннинг қароргоҳига зарба бермагани айтилган. Трамп ушбу ҳаволани мақола сарлавҳаси – “Путиннинг “ҳужум” ҳақидаги шов-шувли баёнотлари айнан Россия тинчликка тўсқинлик қилаётганини кўрсатади” билан бирга жойлаштирган.

Эслатиб ўтамиз, аввалроқ Ўзбекистон Республикаси Президенти Шавкат Мирзиёев Россия Федерацияси Президенти Владимир Путин билан телефон орқали мулоқот қилиб, айтилаётган ушбу ҳужум қилишга уринишни қоралаган эди.