Макгрегор халқдан уни президентликка номзод қилиб кўрсатишни сўради

UFC юлдузи Конор Макгрегор Ирландия халқига мурожаат қилиб, уни мамлакат президенти лавозимига номзод сифатида қўллаб-қувватлашга чақирди. Бу ҳақда у кеча, 4 сентябрь куни ўзининг X ижтимоий тармоғидаги саҳифасида видео эълон қилди.

“Агар менинг исмимни президентлик сайлови бюллетенида кўришни истасангиз, сизни бугуноқ ўз маҳаллий туман кенгаши депутатларингизга мурожаат қилиб, мени номзод сифатида кўрсатишни сўрашга чақираман.

Бизнинг кенгаш депутатларимиз – жамиятимизнинг таянчи. Улар одамлар учун кўпроқ меҳнат қилади ва кўпроқ натижа беради ҳамда мамлакатни қайта-қайта муваффақиятсизликка йўлиқтираётган Оирехтас (Ирландия парламенти) аъзоларидан кўра самаралироқ ишлайди”, дейди Макгрегор.

Шунингдек, у депутатларга ҳам алоҳида мурожаат қилган.

“Агар сиз кенгаш депутатисиз-у, овозингиз эътиборсиз қолаётганини, қўлларингиз боғланганини ва жамиятингиз эътибордан четда қолаётганини ҳис қилсангиз, унда сиздан менинг ёнимда туришингизни сўрайман. Мени номзод қилиб кўрсатинг, мен эса сизга чинакам эшитилиш учун минбар ва куч бераман. Агар сиз Макгрегорга овоз бермоқчи бўлсангиз, ҳаммаси ҳозирдан бошланади. Бугуноқ ўз маҳаллий депутатингизга қўнғироқ қилинг ва ўзгаришни талаб қилинг”, дейди собиқ UFC чемпиони.

Эслатиб ўтамиз, жорий йилнинг баҳорида Конор Макгрегор Оқ уйга ташриф буюриб, АҚШ Президенти Дональд Трамп билан учрашган эди. Шундан сўнг, Ирландия Бош вазири Михол Мартин Конор Макгрегорни Оқ уйда айтган антимиграцион гаплари учун танқид қилган.

Кейинроқ жангчи Ирландия президентлигига яқинлашиб келаётган сайловларда ўз номзодини илгари суриш ниятида эканини билдирган.