Моуриньюнинг Туркиядаги қарзи маълум қилинди

Жорий мавсум бошида Туркиянинг “Фенербаҳче” клуби билан хайрлашган португалиялик мураббий Жозе Моуриньюнинг 15 ойлик фаолияти давомида Истанбулдаги Four Seasons меҳмонхонасининг энг ҳашаматли хонасида яшагани ва бу тураржой учун 36,5 миллион лира (747 000 евро) қарзи борлиги маълум бўлди. Бу ҳақда “Haberler” нашри хабар берди.

Манбага кўра, Жозе Моуринью мамлакатни тинчгина тарк этган бўлса-да, унинг кетиши “Фенербаҳче”нинг молиявий аҳволига салбий таъсир кўрсатган. Журналист Mуғе Доғистонли Эрдўғаннинг маълум қилишича, Моуринью бутун фаолияти давомида Four Seasons меҳмонхонасининг энг ҳашаматли хонасида яшаган ва бу харажат клубга 36,5 миллион лирага тушган ва бу қарзни клуб тўлаши кутилмоқда.

Мураббийга шартномани бекор қилингани учун бериладиган товон пули миқдори ҳали расман эълон қилинмаган, бироқ шартноманинг бекор қилиниши ва меҳмонхона харажатлари “Фенербаҳче”га сезиларли молиявий зарар келтиргани айтилмоқда.

Маълумот учун, Моуринью Туркиядаги 15 ойлик фаолиятидан кейин, UEFA Чемпионлар лигаси плей-офф босқичида “Бенфика”га қарши мағлубиятдан сўнг, клуб раҳбарияти билан хайрлашган эди.

Эслатиб ўтамиз, португалиялик мутахассис Жозе Моуриньюни “Фенербаҳче”дан истеъфога чиқарилгандан сўнг “Бенфика” жамоасига бош мураббий этиб тайинланган эди.