Мухлислар калтаклаган футболчилар клубни тарк этмоқчи

Аввалроқ, Франциянинг “Ницца” футбол клуби мухлислари миллий чемпионат ва Европа лигасидаги ёмон натижалар туфайли жамоа футболчиларини калтаклашгани ҳақида хабар берилган эди. Энди жабрланган икки футболчи Терем Моффи ва Жереми Бога клубни тарк этмоқчи эканлигини маълум қилди. Бу ҳақда “Sports” нашри хабар берди.

Манбага кўра, 28 ёшли кот-д’Ивуарлик Бога ва 26 ёшли нигериялик Моффи энди “Ницца”да ўйнашни истамайди ва қишки трансфер ойнасида янги жамоалар топишни режалаштирмоқда. Улар фаол равишда клубни тарк этмоқчи бўлиб, бу ҳақда жамоага хабар қилган. Футболчилар ушбу ҳолат юзасидан мухлисларга қарши иш очишни режалаштирмоқда. 

Маълумот учун, кетма-кет олтинчи мағлубиятни қабул қилиб олган “Ницца” футболчиларини машғулот маркази олдида 400 га яқин мухлис кутиб олган. Айнан шу ерда икки томон ўртасида кескин тўқнашув келиб чиққан.

Кўплаб фанатлар мағлубият сериясидан сўнг ўз норозиликларини билдириш, жамоани “уйғотиш” мақсадида тўпланган, бироқ бу учрашув спорт директори Флориан Морис, шунингдек, Бога ва Моффи билан кескин тортишувларга сабаб бўлган.

Ўйинчилар автобусдан тушиб, машиналарига йўл олганида, улар оломон орасидан ўтишга мажбур бўлишган. Оқибатда Терем Моффи ва Жереми Богани айрим фанатлар урган ва ҳатто юзларига тупурган. 

Футболчиларлар тиббий ёрдам ҳам олган. Моффи камида 1 ҳафтага сафдан чиққани, Бога эса беш кунлик меҳнатга лаёқатсизлик варақаси олгани айтилмоқда.