Нью-Йорк мэри Мадуронинг олиб қочилишини қоралади

Нью-Йорк мэри Зоҳран Мамдани АҚШ томонидан Венесуэла етакчиси Николас Мадуронинг қўлга олиниши бўйича ўтказилган операцияни “уруш ҳаракати” ва халқаро ҳамда федерал қонунларнинг бузилиши сифатида баҳоламоқда. Мэрнинг бу ҳақдаги сўзларини CNN келтирди.

Мадуро ва унинг рафиқаси Каракасда қўлга олинган ва кейин АҚШга олиб кетилган. Кутилишича, Венесуэла етакчиси Нью-Йоркда федерал ҳибсда сақланади ва у ерда унга нисбатан айбловлар қўйилиши мумкин. Атиги уч кун олдин мэрлик лавозимига киришган Мамдани операция ҳақида ҳам, Мадурони айнан Нью-Йоркда федерал ҳибсга олиш режалаштирилгани ҳақида ҳам олдиндан хабардор қилинганини айтган.

Мэрнинг таъкидлашича, суверен давлатга нисбатан бир томонлама ҳужум уруш ҳаракати ҳисобланади ва федерал ҳамда халқаро ҳуқуқни қўпол равишда бузади. Унинг сўзларига кўра, режимни алмаштиришга қаратилган бундай уринишлар нафақат хориждаги воқеаларга, балки бевосита Нью-Йорк аҳолисига, жумладан, бу шаҳарни ўз уйи деб биладиган ўн минглаб венесуэлаликларга ҳам таъсир қилади.

Мамдани Трамп билан телефон орқали гаплашганини ва Мадуронинг ҳамда унинг рафиқасининг ҳибсга олиниши масаласида ўз норозилигини очиқ билдирганини тасдиқлаган. У бу норозилик режимни зўравонлик билан алмаштиришга қарши эканига ва федерал ҳамда халқаро ҳуқуқ бузилишига йўл қўйиб бўлмаслигига асосланганини айтган. Мэрнинг сўзларига кўра, у ўз позициясини аниқ баён қилган ва суҳбат шу билан якунланган.

Қайд этиш жоиз, Мамдани сайловолди кампанияси пайтида Мадурони “диктатор” деб аташдан тийилгани учун танқид қилинган. Кейинчалик, у ўз позициясини аниқлаштириб, Мадурони диктатор деб ҳисоблашини билдирган.

Эслатиб ўтамиз, жорий йилнинг 3 январь куни тунда Венесуэла пойтахти Каракас шаҳрида портлашлар содир бўлди. Шундан сўнг АҚШ Президенти Дональд Трамп Қўшма Штатлар Венесуэлага кенг кўламли зарбалар бергани, Венесуэла Президенти Николас Мадуро эса рафиқаси билан қўлга олиниб, мамлакатдан олиб чиқиб кетилганини билдирди.

АҚШ расмийлари эр-хотинни “наркотерроризм”да айбламоқда, яқин вақт ичида улар АҚШ судида жавоб беради.

Ҳозирда Венесуэла вице-президенти Делси Родригес мамлакат президенти вазифасини вақтинча бажарувчи этиб тайинланган. У Мадуро ва унинг рафиқасини зудлик билан озод қилишни талаб қилмоқда. Маълум қилинишича, улар аллақачон Бруклиндаги (Нью-Йорк) тергов изоляторига етказилган.

Кейинчалик, айбланувчилар орасида Мадуронинг ўзи ва рафиқасидан ташқари ўғли – кичик Николас Мадуро ҳам борлиги айтилди.