Оқ уй яқинидаги отишмадан сўнг Миллий гвардия ходими ҳалок бўлди

Вашингтон шаҳридаги Оқ уй яқинида содир бўлган отишмада яраланган Миллий гвардия ходимларидан бири ҳалок бўлди. Бу ҳақда кеча, 27 ноябрь куни АҚШ Президенти Дональд Трамп мамлакат ҳарбийларига йўллаган мурожаатида маълум қилди.

“Миллий гвардия ходими Сара Бекстром Оқ уй яқинида содир бўлган отишма оқибатида жароҳат олиб, шифохонада вафот этди”, деган Трамп. 

Трампнинг айтишича, 20 ёшли Бекстром – Ғарбий Виржиниядан бўлган ҳарбий хизматчи саналади. У хизматини 2023 йилнинг июнь ойида бошлаган. АҚШ Президенти ҳалок бўлган ҳарбийни “жуда ҳурматли ва ажойиб инсон” деб атаган.

Трамп, шунингдек, Вашингтондаги отишмада яраланган иккинчи Миллий гвардиячи, 24 ёшли Эндрю Вулф “жуда оғир аҳволда” эканини маълум қилган. Трамп оғир яраланган ходимга алоқадор бошқа маълумотларни тилга олмаган.

Миллий гвардия ходимлари иштирокидаги отишма 26 ноябрь куни Оқ уй яқинидаги Фаррагут майдонида содир бўлган. ОАВ маълумотларига кўра, эркак огоҳлантиришсиз навбатчилик қилаётган ҳарбийларга қарата ўқ узган.

Кейинчалик бир нечта расмийлар отишмада гумонланувчи – 29 ёшли Раҳмонуллоҳ эканини аниқлаган. У 2021 йилда Афғонистондан АҚШга кирганини билдирилган. 

Хабарга кўра, у аввал Афғонистонда АҚШ махсус хизматлари билан ҳамкорлик қилган. Шу сабабли, 2021 йилда АҚШ қўшинларининг Афғонистондан чиқиб кетиши ва “Толибон” ҳокимиятни эгаллаганидан кейин унга АҚШга кўчиб ўтиш ҳуқуқи берилган.

CNN маълумотига кўра, гумонланувчи 2024 йилда АҚШдан бошпана сўраган ва бу ариза 2025 йил бошида қаноатлантирилган.

Ҳодисага муносабат билдирар экан, Трамп Миллий гвардия ҳарбийларига қилинган ҳужумни “террор” ва “бутун мамлакатга қарши жиноят” деб атаган. 

Трамп ўз мурожаатида яна Байден президентлиги даврида Афғонистондан АҚШга кирган барча хорижий фуқаролар қайта текширувдан ўтказилишини билдирган. Унинг сўзларига кўра, АҚШ расмийлари бу ерда ўзига жой топмайдиган ҳар қандай чет элликни чиқариб юбориш учун зарур барча чораларни кўради.

ОАВнинг таъкидлашича, Раҳмонуллоҳнинг бошпана сўраб ёзган аризаси Трампнинг қайта ҳокимиятга қайтганидан кейин, айнан унинг администрацияси томонидан қабул қилинган. Ҳужумдан олдин гумонланувчи жиноят содир этган шахс сифатида полицияда қайд этилмаган.

Эслатиб ўтамиз, аввалроқ АҚШ Афғонистон фуқароларининг мамлакатга кириш учун барча аризаларини дарҳол чекланган муддатга тўхтатганини эълон қилганди.