Оқ уйдаги шоу: UFC’да тарихий рекорд ўрнатилди

UFC тарихида илк бор турнирдаги барча жанглар нокаут билан якунланди. Рекорд кеча, 14 июнь куни Оқ уйдаги шоуда ўрнатилди. Бу ҳақда “Heavy” хабар берди.

UFC Freedom 250 турнири Оқ уй ёнида ташкил этилган вақтинчалик аренада бўлиб ўтди. Мазкур тадбир АҚШ мустақиллигининг 250 йиллигига бағишланди ва мамлакат Президенти Дональд Трампнинг 80 ёшлик юбилейи кунида ўтказилди. Трампнинг ўзи шоуда шахсан ҳозир бўлди.

Ташкилий ишларнинг ўзига хослиги туфайли кардга еттита жанг киритилди. Одатда битта UFC турнирида 12-13 та баҳс ўтказиларди. Якунда барча тўқнашувлар нокаут (ёки техник нокаут) билан тугади. Бу промоушен тарихида илк бор кузатилишидир.

“Шоунинг энг яхши чиқиши” учун белгиланган 425 минг долларлик йирик бонусга америкалик Майкл Чендлер ва бразилиялик Алекс Перейрани муддатидан олдин мағлуб этган бразилиялик Маурисио Руффи ҳамда франциялик Сирил Ган сазовор бўлди.

“Кечанинг энг яхши жанги” мукофоти эса Жастин Гэтжи ва Илия Топурияга берилди. Америкалик жангчи грузиялик рақибини нокаутга учратиб, енгил вазн тоифасида янги чемпионга айланди. Иккала спортчи ҳам 400 минг доллардан қўлга киритадиган бўлди.

Қолган барча ғолибларга жангни муддатидан олдин якунлаганликлари учун 25 минг доллардан пул мукофоти тўланади.

Эслатиб ўтамиз, аввалроқ Оқ уйдаги тарихий UFC Freedom 250 турнирининг асосий кард жангида Жастин Гэтжи Илия Топурияни техник нокаутга учратиб, енгил вазн тоифасининг янги чемпиони ва камар соҳибига айлангани ҳақида хабар берилган эди.