“Орешник” ҳали жанговар қўлланилмади – Путин

Россия Президенти Владимир Путин “Орешник” ҳали жанговар қўлланилмаганини айтди ва Украинадаги маҳаллаларга айнан шу қурол орқали зарба бериш билан таҳдид қилди. Бу ҳақда у кеча, 5 июнь куни Санкт-Петербург халқаро иқтисодий форуми доирасида халқаро ахборот агентликлари раҳбарлари билан учрашувда сўз очди.

Владимир Путин “Орешник”нинг қўлланилиши ҳақидаги саволга жавоб берар экан, у шу пайтгача жанговар мақсадларда ишлатилмаганини айтган. 

“Биз натижаларни кўриш қулай бўлган жойга зарба бердик. Бу Белая Церковь ва ДХР (Донецк Халқ Республикаси) ҳудудига ҳам тегишли. У ерга кейин бизнинг дронларимиз учиб бориб, миллиметригача кўздан кечирди. Бу келажакда “Орешник”нинг нишонларга, жумладан, шаҳар маҳаллалари ҳудудида қўлланилишини кузатиш учун бизга жуда муҳим”, дейди Путин.

Шу билан бир пайтда у бутун Донбассни эгаллаб олиш режасини яна бир бор баён қилиб, бу ҳолат эҳтимолий тинчлик битими тузилишига зид эмаслигини қайд этган. 

“Биринчидан, бири иккинчисини истисно қилмайди. Бутун Донбасс минтақасини назорат қилиш ва битим тузиш – булар бир-бирига зидми? Нима учун бу зиддиятли деб ҳисоблаяпсиз?” дейди у журналистларга.

Украинадаги соф ҳудудий йўқотишлар фонида Путин яна бир бор Россия армиясининг“ҳар кунги ҳужуми” ҳақида гапириб, унинг иддаосига кўра, армия “фақат охирги вақтнинг ўзида” Украина ҳудудининг 2440 минг квадрат километрини эгаллаб олган. 

“Ҳозирги вақтда Россия армияси Луганск Халқ Республикасини тўлиқ – 100 фоиз назоратга олди ва Донецк Халқ Республикаси ҳудудининг 85 фоиздан ортиғини ўз назорати остига қўйди”, дейди Путин ва “яқин-яқингача Украина Донецк вилоятининг тахминан 25 фоизини назорат қилиб турганини” қўшимча қилган.

Шунингдек, у Москва Анкорижда бўлиб ўтган Россия-Америка музокаралари давомида эришилган муросалар асосида Киев билан келишиб олишни истаётганини маълум қилган. 

“Ушбу муросаларга Украина томони ҳам рози бўлиши керак. Шунда можаро тез орада ўзининг табиий якунига етади”, дейди Путин.

Эслатиб ўтамиз, аввалроқ Украина Президенти Владимир Зеленский Россия Президенти Владимир Путинга очиқ мактуб йўллаб, тўғридан тўғри музокаралар жараёнини бошлаш ва давлат раҳбарларининг шахсий учрашувини ўтказишни таклиф қилганди. Мактубда Зеленский бутун фронт чизиғи бўйлаб ўт очишни тўхтатиш ва давлат раҳбарларининг нейтрал ҳудудда учрашувини ташкил этишни илгари сурган.