Отабек Умаров FIA Сенати йиғилишида қатнашди

Кеча, 8 май куни Франциянинг Париж шаҳрида Халқаро автомобиль федерацияси (FIA) сенатининг йиғилиши бўлиб ўтди. Унда Ўзбекистон МОҚ раисининг биринчи ўринбосари Отабек Умаров биринчи бор Сенат аъзоси сифатида иштирок этди. Бу ҳақда Ўзбекистон миллий Олимпияда қўмитаси матбуот хизмати хабар берди.

Манбага кўра, Отабек Умаров ушбу тадбирида Марказий Осиё минтақасидан қатнашган дастлабки вакил бўлган.

FIA Президенти Муҳаммад Бен Сулаем раислигида ўтган тадбирда жаҳон автоспорти ва мобиллик йўналишларига оид истиқболли режалар, йирик лойиҳалар кўриб чиқилган. Шунингдек, ташкилотнинг узоқ муддатли стратегиясига оид таклифлар тингланган.

Маълумот учун, FIA Сенати ташкилот Бош Ассамблеясига стратегик тавсиялар киритувчи асосий бошқарув органларидан бири бўлиб, унинг фаолиятида шаффофлик, ҳисобдорлик ва молиявий барқарорликни таъминлашда муҳим ўрин тутади.

Эслатиб ўтамиз, аввалроқ Отабек Умаров Халқаро автомобиль федерацияси (FIA) Сенати таркибига кирганлиги ҳақида хабар берилганди.