Португалиянинг янги президенти сайланди

Португалияда кеча, 8 февраль куни бўлиб ўтган президентлик сайловининг иккинчи турида чап марказчи Социалистик партия номзоди Антониу Жозe Сегуру ғолиб бўлди. Бу ҳақда президентлик сайловининг расмий сайтида келтирилган.

Расмий маълумотларга кўра, 63 ёшли Сегуру 66,8 фоиз овоз тўплаган. Унинг асосий рақиби ўнг қанотдаги “Чега” партияси етакчиси Андре Вентура эса 33,2 фоиз овоз олган. 

Сегуру сўнгги 20 йил ичида Португалияда сайланган илк социалист президент бўлган. Уни сайловдаги ғалаба билан мамлакат Бош вазири, ўнг марказчи Социал-демократик партия етакчиси Луис Монтенегро табриклаб, яхши ҳамкорликка умид билдирган.

2016 йилдан бери икки муддат кетма-кет лавозимни эгаллаб келган Марселу Ребело де Соуза 2026 йил 9 март куни президентлик ваколатларини Антониу Жозe Сегуруга топширади.

Маълумот учун, сайловнинг биринчи тури жорий йилнинг 18 январида бўлиб ўтган. Ҳеч бир номзод 50 фоиздан ортиқ овоз ололмагани учун иккинчи тур ўтказилди. Сегуру ўшанда 31,1 фоиз, Вентура эса 23,5 фоиз овоз тўплаган.

Эслатиб ўтамиз, аввалроқ Лаура Фернандес Коста-Рикадаги президентлик сайловларида жиноятчиликка қарши қатъий сиёсатни тарғиб қилган платформа билан ғалаба қозонганди.

Фарангиз Суннатова