Рютте кимлар Украинанинг НАТОга қўшилишига рози бўлмаётганини айтди

НАТО Бош котиби Марк Рютте АҚШ, Венгрия ва Словакия Украина НАТОга қўшилишига рози бўлмаслигини айтди. Бу ҳақда у бугун, 18 декабрь куни Польшанинг Варшава шаҳрида журналистлар билан суҳбатда маълум қилди. 

“Украина НАТОга аъзо бўлиши масаласи принципиал ва амалий жиҳатдан муҳимдир. Принципиал жиҳат шундан иборатки, Евро-Атлантик минтақасидаги ҳар қандай давлат НАТОга қўшилиш мақсадига эга бўлиши мумкин. Амалий жиҳатдан эса бир нечта аъзо давлатлар бунга розилик билдирмайди, яъни Украина НАТОга аъзо бўлиш бўйича якдил келишув бўлмайди. Бундай давлатлар – АҚШ, Словакия ва Венгрия”, дейди Рютте.

Унинг сўзларига кўра, ҳозирги вақтда НАТО давлатлари Украина хавфсизлигини кафолатлаш тизимини ишлаб чиқмоқда, лекин бу тизим Украина аъзолигини назарда тутмайди.

“Хавфсизлик кафолатлари ҳозирги лойиҳалаштирилаётган шаклда уч қатламдан иборат. Биринчи қатлам – Украина Қуролли кучлари бўлиб, улар биринчи мудофаа чизиғи бўлади. Иккинчи чизиқ – “кўнгиллилар коалицияси” томонидан лойиҳаланадиган чора-тадбирлар, яъни биз Европада тинчликни таъминлашни биргаликда кафолатлай оладиган имкониятлар. Учинчи элемент – бу Америка Президенти августда айтганидек, АҚШ хавфсизлик кафолатларининг бир қисми бўлишини истаймиз”, дейди НАТО Бош котиби.

Унинг айтишича, ҳозир музокаралар давом этмоқда. У тўлиқ коллектив ҳужжатлар тўплами қандай кўринишга эга бўлиши ҳақида.

Эслатиб ўтамиз, аввалроқ АҚШ Россиянинг Украинага қарши урушига барҳам бериш бўйича музокараларда олға силжиш кузатилаётганини маълум қилар экан, Киевга НАТО услубидаги хавфсизлик кафолатларини тақдим этишни таклиф қилгани ҳақида хабар берилган эди. Бироқ ҳудудий ён беришлар масаласида келишувга эришилмаган.