Шавкат Мирзиёев Трампни таваллуд куни билан табриклади

Ўзбекистон Республикаси Президенти Шавкат Мирзиёев Америка Қўшма Штатлари Президенти Дональд Трампга таваллуд куни – юбилей айёми муносабати билан табрик йўллади. Бу ҳақда Ўзбекистон етакчисининг матбуот котиби хабар берди.

“Сизни бой тажрибага эга, ўз халқининг ҳурмат ва эҳтиромига сазовор бўлган атоқли давлат арбоби сифатида яхши биламиз. Сизнинг қатъий сиёсий етакчилигингиз ва мустаҳкам иродангиз туфайли Америка Қўшма Штатларининг халқаро майдондаги обрў-эътибори ва қудрати тобора мустаҳкамланиб бораётганини алоҳида таъкидлашни истар эдим”, дейилади мактубда.

Шунингдек, Ўзбекистон ва АҚШ ўртасидаги муносабатларнинг бугунги суръатига алоҳида эътибор қаратилган. Ўзаро ҳурмат, ишонч ва муштарак манфаатларга асосланган алоқалар сўнгги йилларда изчил ривожланиб, сифат ва мазмун жиҳатидан янада бойиб бораётгани қайд этилган.

“Бугун Ўзбекистон – АҚШ алоқалари ҳар қачонгидан ҳам мустаҳкам ва амалий руҳ касб этаётгани ҳам айни ҳақиқатдир”, дейилади мактубда.

Ўзбекистон раҳбари очиқ ва конструктив ҳамкорликка интилаётган мамлакат сифатида Ўзбекистон АҚШ билан кўп қиррали ва стратегик шерикликка асосланган алоқаларни янада чуқурлаштиришдан манфаатдор эканини билдирган. Жумладан, савдо-иқтисодий ва инвестициявий ҳамкорликни янги босқичга олиб чиқишга алоҳида аҳамият қаратилаётгани қайд этилган.

Ўзбекистон Президенти Дональд Трампнинг тинчлик ва барқарорликни таъминлашга қаратилган халқаро саъй-ҳаракатларини юксак қадрлашини таъкидлаган. Турли халқаро ва минтақавий платформалар доирасидаги кўп томонлама ҳамкорлик бундан кейин ҳам ривожланиб, янги амалий натижалар билан бойиб боришига ишонч билдирилган.

Стратегик шерикликнинг истиқболли йўналишларини батафсил муҳокама қилиш мақсадида Ўзбекистон Президенти америкалик мавқедошини Ўзбекистонга илк тарихий ташриф билан келишга таклиф этган.

Якунда Ўзбекистон етакчиси Дональд Трампга мустаҳкам сиҳат-саломатлик, оилавий бахт-саодат, масъулиятли давлатчилик фаолиятида улкан муваффақиятлар, Америка халқига эса тинчлик-осойишталик ва фаровонлик  тилаган.