Шавкат Мирзиёев Ўзбекистон терма жамоасини ЖЧга кузатиб қўйди

Бугун, 22 май куни Президент Шавкат Мирзиёев футбол бўйича Ўзбекистон миллий терма жамоасини 2026 йилги жаҳон чемпионатига кузатиш маросимида иштирок этди. Бу ҳақда Президент матбуот хизмати хабар берди.

Маросим аввалида Ўзбекистон миллий терма жамоаси аъзолари майдонда саф тортган.

Давлат раҳбари стадионда тўпланган юртдошлар, футбол мухлислари, миллий терма жамоа аъзолари, мураббийлар штаби ва спорт жамоатчилиги вакилларини катта футбол байрами билан табриклаган.

Бугунги кун ўзбек футболи учун яна бир тарихий сана экани, миллий терма жамоамиз АҚШ, Мексика ва Канада майдонларида ўтадиган жаҳон чемпионатига катта ишонч ва эзгу тилаклар билан кузатилаётгани таъкидланган.

Давлат раҳбари футболчилар мамлакатга унутилмас қувончли кунларни тақдим этганини таъкидлаб, уларга, уларни тарбиялаб вояга етказган ота-оналарига, устоз ва мураббийларига, терма жамоамизнинг барча аъзоларига бутун халқимиз номидан чуқур миннатдорлик билдирган.

Маросимда футбол мухлисларининг миллий жамоага бўлган меҳри ва садоқати алоҳида эътироф этилган. Президент ғалаба онларида ҳам, қийин дамларда ҳам футболчилар билан бирга бўлиб, уларни доимо қўллаб-қувватлаб келаётган юртдошларга раҳмат айтган.

Фан-клублар фаолияти ҳам алоҳида қайд этилган. Таъкидланганидек, улар терма жамоа ўйинларини нафақат трибунадан кузатмоқда, балки ҳар бир баҳсда ўзбекона, бетакрор услуби билан “ўн иккинчи ўйинчи” вазифасини муносиб бажариб келмоқда. Давлат раҳбари улар жаҳон чемпионатида ҳам минглаб юртдошлар ва хориждаги ватандошлар билан бирга футболчиларни қўллаб-қувватлашига ишонч билдирган.

Давлат раҳбари миллий терма жамоа аъзоларига мурожаат қилиб, халқ уларга оқ фотиҳа бериб, катта мундиалга кузатаётганини таъкидлаган. Олдинда Португалия, Колумбия ва Конго терма жамоалари билан муҳим ўйинлар кутиб тургани, футболчилар катта куч-ғайрат ва ишонч билан майдонга чиқиши зарурлиги қайд этилган.

“Шуни билингки, биз доим сизлар биланмиз. Ҳақиқий ўзбекона жасорат, матонат ва иродангиз билан чиройли ва ишончли ўйин кўрсатиб, барчамизни хурсанд қиласиз деб ишонамиз”, деган Президент.

Нутқ якунида Ўзбекистон Республикасининг Давлат мадҳияси янграган.

Президент Шавкат Мирзиёев Ўзбекистон миллий терма жамоаси аъзолари билан эсдалик суратига тушган. Тадбир якунида миллий терма жамоанинг назорат учрашуви бўлиб ўтган.