Суперлиганинг энг қиммат футболчиси эълон қилинди

Transfermarkt портали Ўзбекистон Суперлигасидаги футболчиларнинг бозор қийматларини янгилади. Унга кўра, “Насаф” дарвозабони Абдувоҳид Неъматов Суперлиганинг энг қиммат футболчиси сифатида қайд этилди.

Ихтисослаштирилган футбол сайти футболчиларнинг бозор қийматини янгилаганидан сўнг, Абдувоҳид Неъматовнинг нархи 1,5 миллион евро дея баҳоланди. Иккинчи ўринда 1,3 миллион евро билан “Пахтакор” футболчиси Ҳожимат Эркинов турибди. Шунингдек, 1,2 миллион евро қиймат билан Шерзод Насруллаев, Люпчо Дориев, Хожакбар Алижонов ва Игор Сергеевлар Суперлиганинг энг қиммат футболчилари қаторида жойлашган. ОКМК футболчиси Хуршид Ғиёсов ва “Нефтчи” ярим ҳимоячиси Жамшид Искандеровнинг қиймати эса 1 миллион еврога тенг.

Янгиланган рейтинг натижасида Суперлигада энг кўп нархи ошган футболчи “Пахтакор” ҳимоячиси Хожакбар Алижонов бўлди. Ўзбекистон миллий терма ҳимоячисининг қиймати 400 минг еврога кўтарилиб, 1,2 миллион еврога етди.

Нархлари энг кўп тушган футболчилар қаторида “Пахтакор” футболчиси Ҳожимат Эркинов етакчи бўлиб турибди. Унинг бозор қиймати 0,2 миллион евродан камайиб,  1,3 миллион еврогача тушган. “Пахтакор”нинг яна бир футболчиси Диёр Холматовнинг ҳам бозор нархи 150 мингдан арзонлаб 450 минг еврога тушган. 

Эслатиб ўтамиз, жорий йилнинг 22 ноябрь куни Фарғонанинг “Нефтчи” жамоаси Навоийнинг “Қизилқум” клубини 4:1 ҳисобида мағлубиятга учратиб, 24 йиллик танаффусдан сўнг Ўзбекистон чемпиони бўлган эди.