Супермодель ва актрисалар: омадсиз пластик жарроҳлик қурбонлари

Инсонлар ҳар доим ҳам соғликларида туғилган муаммолар оқибатида мажбурликдан операция столида ётмайдилар. Чунки баъзилар ташқи кўринишидаги айрим жиҳатларни ўзгартиришга уринади, бу борада айниқса миллионлаб одамлар диққат марказида турувчи машҳур аёллар анча илдам. Афсуски, ҳар доим ҳам бундай “ўзгартириш амалиётлари” омадли якун топавермайди ва кутилмаган даҳшатларга сабаб бўлади. Ҳаттоки, дунё бўйлаб омадсиз пластик жарроҳликлар рейтинглари тузилган ва рўйхатлар тез-тез янгиланиб туради. Мақолада шундай омадсизликка учраб, карьераси барбод бўлган машҳурлар ҳақида сўз боради.

Америкалик супермодель, телебошловчи, ёзувчи ва актриса Женис Дикинсон

Ўзини “дунёнинг биринчи рақамли супермодели” деб атаган Женис Дикинсон ўтган асрнинг 70-80 йилларида гўзаллиги билан кўпчиликни лол қолдирган. Аммо бугунги кунга келиб, ўша ёқимтой чеҳрадан асар ҳам қолмаган.

Женис илк марта 33 ёшида пластик операция қилдирган ва шундан сўнг бир неча бор турли жарроҳлик амалиётларини бошдан кечирган. Қоринни тортиш, қоматни шакллантириш, кўз қовоқларини кўтариш – Женис буларнинг барчасини синаб кўрган! Аммо у бу маъносиз курашга шунчалик берилиб кетдики, бугунги кунга келиб, унинг илгари бўлган гўзаллигидан асар ҳам қолмаган...

Кореялик модель Ҳанг Миоку

Собиқ модель Ҳанг Миоку биринчи марта 28 ёшида пластик операция қилдирган. У буни одат тусига айлантириб олиб, Япония каби чет давлатларда ҳам қўшимча амалиётлар қилдирган.

Шифокорлар уни операция қилишдан бош торта бошлагач, Ҳанг ҳаттоки, қора бозордан силикон сотиб олиб, уни ўз қўли билан юзига укол ёрдамида киритган. Силикон тугагач эса озиқ-овқат ёғларидан фойдаланишни бошлаган! Шундай қилиб, модель даҳшатли кўринишга келган.

Швейцариялик тадбиркор аёл Жослин Вильденштейн

Миллиардер Жослин Вильденштейн кўплаб юз пластик амалиётлари ва мушукка ўхшаш ташқи кўриниши билан танилган. Жослин аслида жуда чиройли аёл бўлган, аммо эрининг хиёнатини тўхтатиш умидида кўплаб операцияларга рози бўлган.

Маълумотларга кўра, у пластик операцияларга деярли 4 миллион доллар сарфлаган. Аммо бундай фидокорлик ҳам етарли бўлмаган чоғи, турмуш ўртоғи билан зиддиятли вазиятда унга қайчи билан ҳужум қилган ва бу учун қамоққа олинган. У 2024 йилнинг сўнгги кунида ўпка эмболияси (ўпка қон томирларидан бирининг тромб билан тўсилиши) оқибатида 84 ёшида вафот этди.

Айтишларича, Жослин камида етти марта юз терисини торттирган, қош ва қовоқларни кўтариш операциясини ўтказган, кўз шаклини “мушуксимон” кўринишга ўзгартирган, ёноқлари ва иягига имплант қўйган ҳамда лаб шаклини ўзгартирган.

Америкалик актриса Ким Новак

Ким Новак бир пайтлар гўзал актриса эди ва машҳур режиссёр Альфред Ҳичкокнинг бир неча фильмларида роль ўйнаган. Бироқ 2014 йилда “Оскар” мукофотини топшириш маросимида у ўзининг ташқи кўриниши билан мухлисларини ҳайратда қолдирди: актрисанинг юзи кўплаб косметик амалиётлар оқибатида хунук кўринишга келганди.

Ҳозирда 80 ёшдан ошган Ким илгариги табиий гўзалликдан йироқ. Машҳур актриса бир нечта омадсиз операциялар қурбони бўлган, деб ҳисобланади.

Америкалик телебошловчи ва теленовеллалар юлдузи Жоан Ван Арк

Жоан Ван Арк XX асрнинг 80 йилларида машҳур ва гўзал сериал юлдузи эди. Аммо сўнгги йилларда у даҳшатли кўринишга келиб қолди. Жоаннинг юз тузилиши бутунлай ўзгарган. У бунга изоҳ беришдан бош тортган, аммо бу ўзгаришлар кўзга яққол ташланади.

Америкалик ижтимоий фаол, мунажжим ва актриса Жаклин Сталлоне

Машҳур актёр ва продюсер Сильвестр Сталлоненинг онаси машҳур Жаклин Сталлоне пластик операцияларни жуда яхши кўрарди. У бир неча марта бурун шаклини ўзгартирган, юзини торттириб, лабларини катталаштирган ва бир неча марта кўз қовоқларини операция қилдирган.

Оқибатда узоқ умри сўнггига келиб, Жаклиннинг юзи асл қиёфасидан бутунлай ўзгариб кетди. Ҳатто ўзи ҳам “ёноқларига ёнғоқ яшириб олган бурундиққа ўхшайман”, деб ҳазиллашган.

Қари бўлишига қарамай, Жаклин соғлиғига жуда эҳтиёткорлик билан ёндашган: диета тутган, спиртли ичимлик ичмаган ва спорт билан шуғулланган. Бу ёрқин шахс бир неча йил олдин 98 ёшида ҳаётдан кўз юмган.