Тошкентда наркокурьерларни ушлаган инспекторга майор унвони берилди (видео)

Тошкент шаҳрининг Чилонзор туманида наркокурерлар фаолиятига чек қўйган профилактика инспекторига майор унвони берилди. Бу ҳақда Жамоат хавфсизлиги департаменти хабар берди.

Воқеа тезкор-профилактик тадбирлар доирасида содир бўлган. 13 март куни Хирмонтепа маҳалласи профилактика инспектори, капитан Лазиз Абдукаримов кўчада шубҳали ҳаракатланаётган икки нафар шахсни текшириш мақсадида тўхтатган.

Бироқ, гумонланувчилар ходимнинг қонуний талабига бўйсунмай қочишга уринган. Профилактика инспектори улардан бирини қувиб етиб, ушлаган. Холислар иштирокида текширув ўтказилганда, унинг ёнидаги сумкадан 59 та зип-пакетга қадоқланган 295 дона “прегабалин” кучли таъсир қилувчи дори воситалари аниқланган.

Тезкор суриштирув давомида қўлга олинган шахс маҳалла ҳудудидаги бир нечта жойларга кўмиб қўйган ҳамда геолокация орқали белгилаб кетган дори воситалари ҳам аниқланиб, ашёвий далил сифатида олинган.

Жиноят қидирув бўлими ходимлари томонидан олиб борилган тезкор тадбирлар натижасида гумонланувчининг қочиб кетган шериги ҳам Шайхонтоҳур тумани ҳудудида қўлга олинган. Унинг ёнидан ҳам тарқатиш учун тайёрланган 35 дона кучли таъсир қилувчи капсула топилган.

Эслатиб ўтамиз, аввалроқ Бухоро вилоятининг Вобкент туманида Ички ишлар бошқармаси (ИИБ) профилактика инспектори ўзини дарёга ташлаган аёлни қутқариб қолгани учун майор унвонини олганди.