Трамп Ҳормуз ёпиқ қолса ҳам урушни тугатмоқчи – ОАВ

Президент Дональд Трамп ўз ёрдамчиларига АҚШнинг Эронга қарши ҳарбий кампаниясини, ҳатто Ҳормуз бўғози ёпиқ қолган тақдирда ҳам якунлашга тайёрлигини маълум қилди. Бу ҳақда Президент маъмурияти вакилларига таяниб, “The Wall Street Journal” хабар берди.

Манбаларнинг сўзларига кўра, сўнгги кунларда Трамп ва унинг маслаҳатчилари Ҳормуз бўғозини очиш бўйича операция белгиланган тўрт-олти ҳафталик муддатдан чиқиб кетиши мумкин деган хулосага келган. Президент АҚШ ўз асосий мақсадларига – Эрон флотини заифлаштириш ва ракета дастурини йўқ қилишга эришишини истамоқда.

Шундан сўнг, WSJ ёзишича, Трамп жорий ҳарбий ҳаракатларни тўхтатишни ва шу билан бирга Теҳронга эркин савдони қайта тиклаш учун дипломатик босим ўтказишни режалаштирмоқда. Агар бу иш бермаса, Вашингтон Европа ва Форс кўрфазидаги иттифоқчилари бўғозни очишда етакчи ролни ўз зиммаларига олишларига ҳаракат қилади.

Трамп ва унинг жамоаси Ҳормуз бўғози АҚШдан кўра Европа, Яқин Шарқ ва Осиё мамлакатлари учун анча муҳимроқ деб ҳисоблашади. Бир неча ҳафта давомида Вашингтон маъмурияти вакиллари иттифоқчи ва шерикларга бўғоз очилишини таъминлайдиган музокаралар ёки операцияларга тайёргарлик кўриш илтимоси билан мурожаат қилган.

Кеча, 30 март куни Трамп АҚШ Эрондаги ҳарбий амалиётларни тўхтатиш бўйича “янги ва оқилонароқ режим” билан жиддий музокаралар олиб бораётганини айтган ва агар Ҳормуз бўғози зудлик билан очилмаса, яна бир бор “Эрон электр станцияларини ер юзидан супуриб ташлаш” билан таҳдид қилган. “The Wall Street Journal” эслатишича, минтақага аллақачон 31-денгиз пиёдалари экспедиция корпуси кириб келган. Шунингдек, у ерга 82-ҳаво-десант дивизияси бўлинмалари ташланган, бундан ташқари, Трамп яна 10 минг ҳарбийни юбориш имкониятини кўриб чиқмоқда.

Оқ уй матбуот котиби Кэролайн Ливитт 30 март куни журналистларга АҚШ Ҳормуз бўғозидаги операцияларни нормаллаштириш устида “ишлаётганини” айтди, бироқ буни асосий ҳарбий мақсадлар – Эрон флоти, ракета дастури ва ядровий салоҳиятига зарба бериш қаторида санамаган. АҚШ Давлат котиби Марко Рубио ҳам шу куни Америка кампанияси бир неча ҳафта ичида якунланишини билдирди. 

“Шундан сўнг биз Ҳормуз бўғози муаммосига дуч келамиз ва қарор қабул қилиш Эроннинг ихтиёрида бўлади”, дея қўшимча қилган у.

Эслатиб ўтамиз, аввалроқ Дональд Трамп операциялар оқибатида Эрон режими аллақачон ўзгаргани ва янги раҳбарлар тайинланганини айтган эди.