Трамп баъзи давлат фуқароларига АҚШга киришни тақиқлади

АҚШ Президенти Дональд Трамп АҚШга киришни Сурия ва яна бир қатор давлатлар фуқаролари учун тақиқлади. Бу ҳақда Оқ уй сайтида эълон қилинган.

Ҳужжатга кўра, янги чекловлар 2026 йил 1 январдан кучга киради ва жами 20 та мамлакат ҳамда ҳудудни қамраб олади, шу билан аввалги рўйхат икки баробарга кенгайди. 

Тўлиқ тақиқ Буркина-Фасо, Лаос, Мали, Нигер, Сурия, Сьерра-Леоне ва Жанубий Судан фуқароларига, шунингдек, Фаластин миллий маъмурияти берган йўл ҳужжатлари эгалари учун жорий этилган. Қисман чекловлар эса Ангола, Антигуа ва Барбуда, Бенин, Габон, Гамбия, Доминикан Республикаси, Замбия, Зимбабве, Кот-дʼИвуар, Малави, Мавритания, Нигерия, Сенегал, Танзания ва Тонга фуқароларига нисбатан қўлланади. Вашингтон бу қарорни хавфсизлик текширувлари ва ахборот алмашинувида жиддий камчиликлари бор давлатлар билан изоҳлади. Шу билан бирга, АҚШ Туркманистон фуқаролари учун ноиммиграцион визаларга қўйилган чекловларни бекор қилди, бироқ иммиграцион визалар бўйича тақиқ сақланиб қолди. Бунга Ашхободнинг АҚШ билан ҳамкорликда идентификация ва маълумот алмашиш жараёнларини яхшилагани сабаб қилиб кўрсатилди. 

Трамп аввалги президентлик даврида ҳам шунга ўхшаш тақиқ жорий этган, кейинроқ у Жо Байден томонидан бекор қилинган эди. Трамп бу чоралар террорчилик таҳдидларининг олдини олишда самарали бўлганини таъкидлаб келади.

“Трамп баъзи мамлакат фуқароларига АҚШга киришни бутунлай тақиқлади, жумладан, Фаластин мухторияти томонидан берилган ёки тасдиқланган йўл ҳужжатлари билан келаётган шахсларга ҳам. У АҚШ иммиграция ва виза бериш жараёнида максимал эҳтиёткорликни таъминлаш зарурлигини таъкидлаган, чунки мамлакатга киришдан олдин ҳар қандай шахснинг америкаликларга ёки миллий манфаатларга зарар етказиш ниятини аниқлаш муҳим. АҚШ ҳукумати кираётган шахслар мамлакат фуқароларига таҳдид солмаслиги, унинг маданияти, ҳукумат тизими ёки асосий принциплари барбод қилинмаслигини, шунингдек, тан олинган хорижий террор ташкилотларини қўллаб-қувватламаслигини кафолатлаши кераклиги қайд этилган”, дейилади Оқ уй томонидан эълон қилинган ҳужжатда. 

Қайд этиш жоиз, ушбу чекловлар мамлакатда кенг илдиз ота бошлаган террорчилик ҳужумларидан сўнг кучайтирилди. Жумладан, жорий йилнинг 26 ноябрь куни АҚШнинг Вашингтон шаҳрида, Оқ уйдан унча узоқ бўлмаган ҳудудда икки нафар Миллий гвардия хизматчиси отиб кетилганди. Кейинроқ эса отишмани уютирган шахс афғонистонлик экани маълум бўлган. Ушбу ҳодиса ортидан мамлакат Президенти Дональд Трамп “ташвишга сабаб бўлувчи давлатдан келган ҳар бир чет элликнинг яшаш картасини тўлиқ ва пухта қайта текшириш” топшириғини берди.

Қолаверса, 13 декабрь куни Америка Қўшма Штатларининг Род-Айленд штати Провиденс шаҳрида жойлашган Браун университетида содир бўлган отишмада икки талаба ҳалок бўлган, етти киши эса жароҳат олганди. Вафот этганлар орасида Ўзбекистон фуқароси, 2007 йилда туғилган Муҳаммадазиз Умурзоқов ҳам бор. Трамп ушбу отишмада ҳалок бўлганлар хотирасига дуо қилишини айтган.